Rusiya Federasiyası prezidentinin Monqolustana elan edilmiş səfəri kontekstində Avropa İttifaqı Beynəlxalq Cinayət Məhkəməsinin qərarlarını dəstəklədiyini bəyan edib və Monqolustana Roma Statutunun iştirakçısı olan dövlətin qərarlarının icrası ilə bağlı öhdəliklərini xatırladıb.
HİT.az xəbər verir ki, bu barədə bu gün Brüsseldə Avropa Komissiyasının sözçüsü Nəbilə Massralı mətbuat üçün brifinq zamanı bildirib.
"Biz Putinin Monqolustana növbəti səfəri ilə bağlı xəbərləri gördük. Monqolustanın da hər bir ölkə kimi öz maraqları əsasında öz beynəlxalq münasibətlərini inkişaf etdirmək hüququ var. Bununla yanaşı, Ukraynanın müvəqqəti işğal olunmuş ərazilərindən minlərlə ukraynalı uşağın cinayətlə deportasiyası və Rusiyaya köçürülməsinə görə Beynəlxalq Cinayət Məhkəməsi tərəfindən Putinin həbsinə order verilib. Monqolustan müvafiq hüquqi öhdəlikləri ilə 2002-ci ildən Beynəlxalq Cinayət Məhkəməsinin Roma Statutunun iştirakçısıdır", deyə Avropa Komissiyasının sözçüsü qeyd edib.
O xatırladıb ki, Aİ artıq Putinin elan etdiyi səfərdən narahatlığını və BCM-nin qərarını dəstəkləmək mövqeyini ifadə edib. Onun sözlərinə görə, bu vəzifə Aİ-nin bu ölkədəki nümayəndəliyi vasitəsilə Monqolustan hakimiyyətinə çatdırılıb.
"Şübhəsiz ki, Aİ Ukraynada Beynəlxalq Cinayət Məhkəməsinin prokuroru tərəfindən aparılan istintaqı dəstəkləyir və biz onun iştirakçısı olan bütün dövlətləri tam əməkdaşlığa çağırırıq", deyə Massralı əlavə edib.
Rusiya lideri Vladimir Putin sentyabrın 3-də Monqolustana səfər etməyi planlaşdırır. Bu səfər ərəfəsində Haaqa Beynəlxalq Cinayət Məhkəməsi Monqolustanın BCM-nin tələblərini yerinə yetirmək öhdəliyinə tabe olduğunu xatırladıb.
2023-cü ilin martında Beynəlxalq Cinayət Məhkəməsi uşaqların Ukraynadan qanunsuz deportasiyası və ukraynalıların Rusiyaya qanunsuz köçürülməsində şübhəli bilinərək Putinin həbsinə order verib.
Samir
