1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Bakıda 49 nömrəli marşrut xətti üzrə işləyən avtobuslar arasındakı interval sərnişinlərin narazılığına səbəb olub.
Oxu.Az xəbər verir ki, bununla bağlı sosial şəbəkədə paylaşım edilib.
Qeyd olunub ki, metronun "Xalqlar Dostluğu" stansiyasından "28 May" stansiyasının yaxınlığına gedən yeganə avtobus olduğu üçün daim sıxlıq müşahidə olunur.
"Gec-gec gəlirlər, uzun fasilədən sonra dalbadal gələn 2-3 avtobusun heç birinə minmək olmur. İstisnaları çıxmaqla, sürücülər sərnişinlərlə kobud rəftar edirlər", - deyə sərnişinlər şikayətlənirlər.
Məsələ ilə bağlı Azərbaycan Yerüstü Nəqliyyat Agentliyinə (AYNA) sorğu ünvanladıq.
Qurumdan Oxu.Az-ın sorğusuna cavab olaraq bildirildi ki, avtobuslar yeddi dəqiqəlik intervalla hərəkət edirlər.
"Azlənd Plaza" MMC-nin müvəqqəti istismarında olan, 68 nömrəli tam orta məktəb-Səməd Vurğun bağı marşrutu üzrə hərəkət edən 49 nömrəli müntəzəm marşrut xəttində 26 avtobus yeddi dəqiqəlik intervalla hərəkət edir. Günün səhər və axşam müşahidə olunan pik saatlarında marşrut xəttinin keçdiyi küçə və prospektlərdə müşahidə edilən sıxlıq səbəbindən avtobuslararası intervalda artım müşahidə edilir.
Mütəmadi olaraq marşrut xətləri üzrə sərnişin tələbatı nəzarətdə saxlanılır daşıyıcı şirkətə avtobus sayının sərnişin axınına uyğun nizamlanması tapşırığı verilib",- deyə məlumatda bildirilir.
Əzizə İsmayılova
