Fransa Futbol Federasiyasının (FFF) prezidenti Filip Diallo “Real”ın fransalı ulduz hücumçusu Kilian Mbappenin milliyə qayıtmasını istəyir.
Arena.az “Madrid Universal” dərgisinə istinadən, fransız məmurun bu barədə fikrini təqdim edir:
“Mbappenin millidə iştirakı ilə bağlı heç bir şübhəm yoxdur. İstədiyim tək məqam, onun tez bir zamanda geri qayıtmasıdır”, deyə Diallo vurğulayıb.
Xatırladaq ki, daha əvvəl “xoruzlar”ın baş məşqçisi, fransız mütəxəssis Didye Deşam, Kilian Mbappenin bərbad idman formasında olduğunu əsas gətirərək, ulduz futbolçunu milli komandanın noyabr toplanışına cəlb etməmişdi. Mətbuatda, Deşamın müvafiq qərarının pərdəarxası məqamlara əsaslandığı haqda şayiələr baş qaldırsa da, fransız mütəxəssis bunları eyninə almayıb.
Deşam Mbappeyə “qulaqburması” verib?
Bununla belə, mətbuatda Deşama müxalif cəbhə fransız mütəxəssisin Mbappedən “intiqam” aldığı qənaətindədir. Belə ki, Deşam Mbappeni futbolçunun öz xahişi əsəasında, dincəlməsi, yüngül zədəsini sağaltması və gərkli idman formasını yığması məqsədilə, “xoruzlar”ın oktyabr toplanışından azad etmişdi. Amma bir neçə gün sonra “zədəli” Mbappe “Real”ın heyətində meydana çıxaraq, təəccüb yaratmışdı.
Vurğulanır ki, məhz bu məqam Deşamı Mbappeyə “qulaqburması” verməyə sövq edib.
Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Kilian Mbappe 2024-cü ilin iyul ayında PSJ-dən azad agent qismində ayrılaraq, İspaniya nəhəngi “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində bütün yarışlarda 16 oyuna çıxıb, 8 qol vurub, 2 məhsuldar ötürmə verib.
Klub səviyyəsində Mbappe PSJ ilə 7 dəfə Fransa Liqa 1-in, 3 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun qalibi olub.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
“Transfermarkt” internet-portalı 25 yaşlı fransalı mərkəz hücumçusunun transfer dəyərini 180 milyon avro məbləğində qiymətləndirir.
