"Taksi fəaliyyətində qiymət azalması müvəqqəti xarakter daşıyır. Bu müddət təxminən 15-20 gün davam edə bilər. Bunun səbəbi COP29 tədbiridir".
Paralel.az xəbər verir ki, bunu Qaynarinfo-ya açıqlamasında nəqliyyat eksperti Aslan Əsədov son günlər taksi fəaliyyətində qiymətlərin enməsi ilə bağlı məsələyə aydınlıq gətirərkən deyib.
Onun sözlərinə görə, qiymətlərin bu şəkildə aşağı səviyyədə qalması mümkün deyil:
"Şəhərdə insanlar azdır. Demək olar ki, şəhər boşalıb. Taksi sürücülərinin sayında da azalma var. Tıxac yaranan kimi qiymətlər yenidən əvvəlki həddə yüksələcək. Hətta ola bilər ki, əvvəlki həddi də keçsin".
Nəqliyyat eksperti Elməddin Muradlı isə taksi sürücülərinin qiymətlərin ucuzlaşmasından narazılıq etdiyini vurğulayıb:
"Bir çox istiqamətlərdə hərəkətin məhdudlaşdırılması ilə əlaqədar intensivlik aşağı düşüb. Amma qiyməti sürücülər deyil, şirkətlər endirib. Şirkətlərin də yanaşması bu şəkildədir ki, tələb artanda qiymət artır, tələb azalanda qiymət azalır".
Elməddin Muradlı həmçinin taksi qiymətlərinin tənzimlənməsinə ciddi ehtiyac olduğunu bildirib:
"AYNA tərəfindən aşağı hədd müəyyənləşdirilib, amma yuxarı həddi də müəyyənləşdirmək lazımdır. Çünki sosial şəbəkələrdə bu istiqamətdə müzakirələr və mübahisələr gedir. Sürücülər iddia edir ki, qiymət çox aşağıdır, əvvəlki formada işləmirlər, deyirlər ki, yeni şərtlərə uyğunlaşaraq, daha keyfiyyətli avtomobil alıblar. Qiymət artımı xidmətin qarşılığında baş verməyib. Sərnişinlər də sosial şəbəkələrdə yazırlar ki, taksi filan istiqamətə baha apardı və s. Bu baxımdan, tərəflərin ortaq məxrəcini tapmaq lazımdır".
