BMT-nin Bakı COP29 Konfransı uğurla davam edir və hər keçən gün yeni qəbul olunmuş tarixi qərarlarla yadda qalır. Azərbaycanın və Bakının adları dünyanın dörd bir yanından eşidilir və 196 ölkənin nümayəndələrinin yerli və beynəlxalq mətbuata verdikləri müsahibələrdə ölkəmizin yüksək təşkilatçılığı və qonaqpərvərliyi haqqında təriflə danışılır. Bu gün demək olar ki, COP sayəsində Azərbaycanın nüfuzu, etimadı və ölkəmizi tanıyanların sayı dünyada bir neçə dəfə artıb.
Prezident İlham Əliyevin noyabrın 12-də COP-un Liderlər Sammitinin açılış mərasimindəki və noyabrın 13-də inkişaf etməkdə olan kiçik ada dövlətlərinin Sammitindəki cəsarətli çıxışları birbaşa hədəfə dəydi və olduqca təsirli oldu. Hər iki çıxışda beynəlxalq hüquq normalarını və insan hüquqlarını kobud şəkildə pozan və neo-müstəmləkəçilik siyasətini davam etdirən Fransa və Niderland haqlı olaraq tənqid olundular. Avropa İttifaqının xarici məsələlər üzrə ali nümayəndəsi Cosef Borelin ittifaqdan kənar ölkələri "cəngəllik" adlandırması, Avropa Parlamentinin və AŞPA-nın dənizaşırı ölkələrdəki siyasi repressiyalara riyakarcasına səssiz qalması qınandı.
Bu tənqidin hədəfi olanlar, yəqin ki, Azərbaycan Prezidentinin belə bir mötəbər tədbirdə bu qədər haqlı və eyni zamanda sərt tənqidlər səsləndirməsini və onları dünyanın gözü qarşısında ifşa etməsini heç vaxt unutmayacaqlar.
Bəli, unutmasınlar! Çünki bu tənqidləri tamamilə haqq ediblər. Həm də onu da unutmasınlar ki, Azərbaycan 1988-ci ildən bu yana onların haqsız və qərəzli hücumlarına məruz qalan bir ölkədir. 30 il ərzində erməni işğalı altında əzab çəkən xalqımızın iztirablarına biganə yanaşan, əksinə, erməni terrorçularını dəstəkləyən və bu gün də Ermənistanı silahlandıran Makronun rəhbərlik etdiyi Fransa ilə başqa cür davranmaq mümkün deyil. Biz beynəlxalq ədalətsizliyin nə demək olduğunu məhz onların sayəsində öyrəndik.
Fransa iqlim dəyişkiliyindən əziyyət çəkən müstəmləkə və kiçik ada dövlətlərinə qarşı da amansızdır. COP kimi nüfuzlu beynəlxalq tədbirdə isə bu siyasətin ifşa olunmaması, sadəcə mümkün deyildi. Bu, həm də Prezident İlham Əliyevin döyüşkən ruhuna, qorxmazlığına, cəsarətinə və prinsipial siyasi mövqeyinə uyğun olmazdı. Unutmayaq ki, hər zaman cəsurlar qalib gəlir.
Digər tərəfdən, məgər torpaqlarımızın işğaldan azad olunması üçün Vətən müharibəsinə və antiterror əməlliyatına başlamaq əmrini verən və hər iki şərəfli missiyasını qələbə ilə başa çatdıran Müzəffər Ali Baş Komandan İlham Əliyev deyilmi? Əgər, cənab Prezident “buna kim nə deyər” və ya “xaricilər buna necə baxar” anlayışı ilə hərəkət etsəydi, o zaman hamı üçün mümkünsüz olanı mümkün etmək, torpaqlarımızı qlobal güclərin əlindən xilas etmək olardımı? Əlbəttə ki, yox!
Məhz buna görə də Prezident İlaham Əliyevin COP29-da etdiyi hər iki cəsarətli çıxışa bu cür yanaşmaq lazımdır. Onun nəticəsidir ki, artıq “The Telegraphe” kimi nüfuzlu dünya nəşrləri Azərbaycan Prezidentinə istinad edərək Makron rejiminin neo-kolonialist cinayətlərindən yazmağa başlayıb, buna cəsarət edib. Dünya ictimaiyyəti və COP kimi geniş imkanlara malik olan beynəlxalq auditoriya cənab Prezidentin sayəsində kiçik ada dövlətlərinin problemləri və onların barbarcasına məruz qaldığı yenimüstəmləkə siyasəti ilə yaxından tanış olublar. Makron rejimi bir daha əmin oldu ki, evi şüşədən olanın qonşusuna daş atması yaxşı vərdiş deyil.
Bütün bunlar təbii ki, Fransanı və Makronu özündən çıxardıb, ciddi narahat edib və ona görə də bütün resurslarını işə salaraq Azərbaycanın COP gündəliyini, inkişaf etməkdə olan kiçik ada dövlətlərinə yönəlik siyasətini hədəfə alıb. Bunun üçün təkcə ekologiya nazirini, Qərbin bir sıra feyk mətbuatını deyil, Əli Kərimli və Qənimət Zahid kimi antimilli qüvvələrin informasiya resurslarını da işə salıb.
Ona görə də təsadüfi deyil ki, son bir həftədir ki, Yelisey sarayının və Makron rejiminin Azərbaycanın əleyhinə istifadə etdiyi əksər tezisləri Əli Kərimli və Qəniumət Zahid olduğu kimi təkrarlayır, COP 29-un Bakıda keçirilməsini gözdən salmağa çalışır, kiçik ada dövlətlətinə yardım edilməsini və onların üzləşdiyi ekzistensial problemlərin qabardılmasını rişxəndlə qarşılayırlar. Bundan başqa, bu kimi antimilli qüvvələr bir neçə aydır ki, Qarabağda və Şərqi Zəngəzurda aparılan quruculuq və yenidənqurma işlərini, Qərbi Azərbaycana qayıdış konsepsiyasını, milli birliyimizi qəsdən hədəfə almaqla dövlətimizə qarşı dezinformasiya və təxribatla məşğuldular.
Ancaq bu təxribatların heç bir nəticəsi olmadı və bundan sonra da olmayacaq.
Anti-Azərbaycan qüvvələri bu dəfə də COP29-da məğlub oldular! Qazanan isə Azərbaycanımız, milli maraqlarımız və strateji hədəflərimız oldu!
Azay Quliyev, millət vəkili
