AZ

“Barselona” rəsmisi: “Erlinq Haland bizə gərəkdirmi?”

“Barselona”nın prezidentinin müşaviri Enrik Masip “Mançester Siti”nin norveçli hücumçusu Erlinq Halandın trasnferi haqda sualı cavablayıb.

Arena.az “Marca” nəşrinə istinadən, müşavirin bu barədə cavabını təqdim edir:

“Klubun yeni iqtisadiyyatı və yeni stadionu ilə “Barselona” istənilən oyunçunu almaq barədə düşünə bilər. Amma o, doğrudanmı gərəkdir, yoxsa onun əvəzinə iki oyunçu gətirmək daha yaxşıdır – bax, bu, başqa məsələdir”, deyə Masip bildirib.

Erlinq Haland “Mançester Siti”yə 2022-ci ilin iyulunda 60 milyon avro məbləğ müqabilində Dortmund “Borussiya”sından keçib. Norveçli hücumçunun İngiltərə klubu ilə müqaviləsi 2027-ci ilin iyun ayının sonuna qədər qüvvədədir.

Cari mövsümdə Haland “şəhərlilər”in heyətində bütün yarışlarda 16 oyuna çıxıb, 15 qol vurub. Erlinqin “Mançester Siti”nin heyətində çıxışının ümumi mənzərəsi isə belədir: 114 oyun, 105 qol, 14 məhsuldar ötürmə.

Haland “Mançester Siti”də ilk mövsümündəcə İngiltərə Premyer Liqasının, İngiltərə Kubokunun, UEFA Çempionlar Liqasının, UEFA Super Kubokunun və FIFA Klub Dünya Kubokunun qalibi olmuşdu. Geridə qalmış mövsümdə isə “qolçu vikinq” ardıcıl ikinci dəfə İngiltərə çempionluğunu qazanıb. Haland yeni mövsümə də İngiltərə Super Kubokunu qazanmaqla başlayıb.

Erlinq Haland hazırda kapitanı olduğu, 2019-cu ilin sentyabr ayında debüt etdiyi Norveç yığmasının heyətində 39 oyuna 38 qol, 4 məhsuldar ötürmə ilə fərqlənib.

“Transfermarkt” internet-portalı 24 yaşlı norveçli hücumçunun transfer dəyərini 200 milyon avro məbləğində qiymətləndirir. Bu, Halandın dünyanın ən bahalı iki futbolçusundan biri olduğu deməkdir (digəri “Real”ın və Braziliya millisinin hücumçusu Vinisius Juniordur).

Seçilən
47
4
arena.az

10Mənbələr