Araşdırmaya görə, “Tesla”nın “Model S” və “Model Y” avtomobilləri ölümlə nəticələnən qəzalara ən çox məruz qalan modellər sırasındadır.
Avtoser.az xəbər verir ki, şirkətin “dünyanın ən təhlükəsiz avtomobilləri” şüarı bu mənzərənin kölgəsində qalıb.
Qəzalar, xüsusən də avtopilot sistemi ilə əlaqəli qəzalar brendin təhlükəsizlik anlayışına ciddi ziyan vurur. Bildirilir ki, NHTSA (ABŞ Milli Avtomobil Yolları Hərəkəti Təhlükəsizliyi İdarəsi) avtopilot sisteminin hərtərəfli nəzərdən keçirilməsinə başlayıb.
“Tesla” avtomobillərinin dizaynı və texnologiyası ilə seçilsə də, bu qəzalar həm istifadəçilərin, həm də mütəxəssislərin gözündə markaya olan inamı sarsıdır. Məlumatlar göstərir ki, “Tesla”nın ölümlə nəticələnən qəza nisbəti digər avtomobil markalarından xeyli yüksəkdir.
Məşhur şirkətin avtopilot sistemi sürücülərə rahat təcrübə təmin etməyi hədəfləsə də, bu sistemin qəzalarda rolu tez-tez mübahisələrə səbəb olur. Sistemin yanlış anlaşılması və sürücünün səhvləri qəzaların əsas səbəblərindəndir. Şirkət avtopilotun yalnız “köməkçi sürmə rejimi” olduğunu bildirsə də, istifadəçilərin sistemə həddən artıq etibar etməsi belə nəticələrə gətirib çıxarır.
(İndex.az)
