Rəqəmsallaşma istiqamətində bilik və bacarıqlarının artırılması
Masallıda “Əhalinin rəqəmsallaşma istiqamətində bilik və bacarıqlarının artırılması” mövzusunda maarifləndirici seminar keçirilib.
Masallı Rayon Statistika İdarəsinin əməkdaşları tərəfindən Masallı Dövlət Regional Kollecinin tələbələri üçün təşkil edilən seminarda Azərbaycan Dövlət Statistika Komitəsi tərəfindən dərc olunan “Azərbaycanda rəqəmsal inkişaf” adlı statistik məcmuədə qeyd olunan informasiya və kommunikasiya texnologiyalarından istifadə və digər aidiyyatı bəndlər izah olunub.
Çıxışlarında rəqəmsal bacarıqların inkişaf və üstünlükləri, insanların texnoloji cəhətdən maariflənməsindən bəhs edən idarə əməkdaşları Savalan İsgəndərli və Elmin Əliyev tələbələrə Masallı rayonunda statistika sahəsində vahid dövlət siyasətinin həyata keçirilməsi, statistik hesabat təqdim edən hüquqi və fiziki şəxslərin siyahısının müəyyənləşdirməsi, iqtisadi, sosial, demoqrafik və ekoloji vəziyyətlə bağlı məlumatların yığılıb toplanması, işlənib hazırlanması, təhlili və yayımının həyata keçirilməsilə bağlı məlumat veriblər.
Seminarın sonunda tələbələri maraqlandıran suallar cavablandırılıb.
Akif AĞAYEV
