İstixana qazlarının tullantılarını azaltmaq üçün təcili tədbirlər görülməsə, dəniz səviyyəsinin on metrlərlə qalxması reallığa çevrilə bilər
Alimlər xəbərdarlıq edirlər ki, bəşəriyyət istixana qazlarının tullantılarını azaltmaq üçün təcili tədbirlər görməsə, qlobal dəniz səviyyəsinin on metrlərlə qalxması reallığa çevrilə bilər. Turkustan.az “Tsn.ua”ya istinadən xəbər verir ki, bu, bütün dünyada sahilyanı şəhərlər və infrastruktur üçün fəlakətli nəticələrlə doludur.
Bunu Antarktida Tədqiqatları üzrə Avstraliya Konfransında alimlər bildiriblər.
Əvvəllər sabit hesab edilən Şərqi Antarktika buz təbəqəsi tədqiqatçıların xüsusi diqqətini çəkir. İndi qlobal istiləşmə səbəbindən sürətlə ərimə əlamətlərini görünməkdədir. Okean və atmosfer temperaturunun yüksəlməsi və daha tez-tez baş verən ekstremal hava hadisələri bu prosesi sürətləndirir.
Son 30 ildə qlobal dəniz səviyyəsi artıq 10 santimetrdən çox qalxıb və bunun əsas amili Antarktika buzlaqlarının əriməsidir. Alimlər xəbərdarlıq edirlər ki, təcili tədbirlər görülməsə, okean 2100-cü ilə qədər 80 santimetr və ya daha çox qalxaraq bir çox sahil şəhərlərini su altında qoya bilər.
Tədqiqatçılar istixana qazlarının tullantılarını dərhal azaltmağın zəruriliyində israr edirlər. Onlar qeyd edirlər ki, qlobal temperaturun hər bir artımı, hətta bir dərəcənin bir hissəsi olsa da, planetin iqlimi üçün geri dönməz nəticələrə səbəb ola bilər. /AYNA/
