“Qarabağ”ın baş məşqçisi Qurban Qurbanov Avropa Liqasının Liqa mərhələsində Lion “Olimpik”inə qarşı keçirəcəkləri oyundan danışıb.
Arena.az xəbər verir ki, Azərbaycan və Fransa klubları arasındakı qarşılaşma sabah Bakıdakı Tofiq Bəhramov adına Respublika stadionunda keçiriləcək.
Bu gün oyundan öncə ənənəvi mətbuat konfransı keçirilib. Mətbuat konfransında Azərbaycan çempionunun baş məşqçisi ilə yanaşı, yarımmüdafiəçi Yassin Benzya da iştirak edib.
Qurban Qurbanov sabahkı oyunla bağlı bunları söyləyib: “Çox keyfiyyətli komandaya qarşı çıxış edəcəyik. “Olimpik” həm oyun sistemi, həm də futbolçuların fərdi bacarığı baxımından olduqca güclüdür. Bizim üçün vacib matçdır, pis hazırlaşmamışıq. Sabah oyunboyu diqqətli olmağa çalışacağıq. Uğurlu nəticə ilə azarkeşlərimizi sevindirmək istəyirik. Rəqibin heyəti ilə maraqlanmışıq, oyunlarına baxıb təhlil etmişik. Ancaq rəqibin kimliyindən asılı olmayaraq, qələbə qazanmaq üçün hazırlaşırıq”.
Baş məşqçi son dövrlər zədədən əziyyət çəkən Marko Veşoviç və Mateus Silvanın hazırlıq durumunu qitmətləndirib: “Hər iki futbolçunun hazırlığı yaxşı səviyyədədir. Bu gün və sabah qəti qərar verəcəyik ki, onlar əsas heyətdə olacaqlar, ya yox. Ümumi hazırlıqlarından razıyam.
Qurbanov Fransa klubuna qarşı necə oynayacaqları barədə sualı isə belə cavablandırıb: “Hər komandanın üstün cəhətləri var. Sadəcə bir neçə detal, element var ki, digər rəqiblərə qarşı necədirsə, bu rəqibə qarşı da o detallarda diqqətli olmalıyıq. Hər zaman oyunun gedişində 1-2 dəyişiklik olur. Rəqibimizin üstün keyfiyyətini nəzərə alaraq, detallara fikir verməliyik. Hücum planımızda da çox yox, 1-2 əlavə düşüncələr olacaq. Həyata keçəcək, ya yox, oyunun gedişatından asılıdır. Hazırlığın çox hissəsini öz oyunumuzun üzərində qururuq. Bizim ən böyük gücümüz kollektiv oyuna üstünlük verməyimizdir. Həm hücumda, həm də müdafiə xəttində. Çünki bu gün komponentlərə baxsaq, Fransa klubu bizdən üstün görünür. Daha yaxşı liqada oynayır, daha böyük klubdur. Amma bizim Avropada böyük təcrübəmiz var. Bundan istifafdə edərək, belə komandalara qarşı düzgün oynamağa çalışmışıq. Kollektiv şəkildə çalışacağıq ki, lazım olan nəticə üçün meydanda ən doğrusunu edək”.
Benzya üçün xüsusi oyun
Yassin Benzya isə sabiq komandasına qarşı matçın onun üçün xüsusi önəm daşıdığını söyləyib: “Əvvəllər formasını geyindiyim Lion klubuna qarşı oyun mənim üçün çox maraqlı olacaq. Bu dəfə “Qarabağ”ın futbolçusu kimi meydana çıxacağam. Mənim üçün çox əhəmiyyətli görüş olacaq. Mənim oynadığım zaman “Olimpik” çox güclü idi. Böyük dəyişikliklərə baxmayaraq, bu komanda indi də yüksək səviyyədədir”.
Qeyd edək ki, sabah Tofiq Bəhramov adına Respublika Stadionunda keçiriləcək bu qarşılaşmaya saat 21:45-də start veriləcək.
