Cəmi 5 illik müddət ərzində Azərbaycanda dörd böyük sosial islahat paketi həyata keçirilib. Ölkə başçısı növbəti sosial islahat paketinin başlanacağını yanvardan etibarən açıqladı.
Fins.az xəbər verir ki, bunu Milli Məclisdə “Dövlət sosial müdafiə fondunun 2025-ci il büdcəsi haqqında” qanun layihəsinin müzakirəsi zamanı əmək və əhalinin sosial müdafiəsi naziri Sahil Babayev deyib.
Nazir vurğulayıb ki, son 5 ildə həyata keçirilən dörd sosial islahat paketi 4 milyon insanı əhatə edib və ümumilikdə 7 milyard manat vəsait ayrılıb:
"Siz hər il dövlət büdcəsini qiymətləndirirsiniz. Hər büdcədə əlavə 7 milyard manatın əhaliyə ödənişlərin artırılmasına yönəldilməsi millət vəkillərimiz tərəfindən yaxşı başa düşülür.
Qısa müddət ərzində ölkədə minimum əməkhaqqı 2,7 dəfə, minimum pensiya 2,5 dəfə, orta aylıq pensiya isə 2,4 dəfə artıb.
Ən həssas təbəqədən olan müavinət və təqaüd alan insanların ödənişləri isə 5 dəfə artıb. Eyni zamanda, bu dövr ərzində əmək müqavilələrinin sayı 600 minə yaxın artıb və ölkənin əməkhaqqı fondu 3 dəfə artıb."
