“Real”ın yarımmüdafiəçisi Cud Bellingem Çempionlar Liqasının Liqa mərhələsinin 5-ci turunda “Liverpul”a qarşı keçirdikləri oyunu şərh edib.
Arena.az xəbər verir ki, ingilis futbolçusu 0:2 hesabıyla məğlub olduqları oyunla bağlı bunları söyləyib:
“Liverpul” sadəcə bizdən üstün idi… Bəzən özünü ələ almaq gərəkdir… Oyunun əksər kəsimlərində onlar üstünlük təşkil edirdilər. Biz isə əlimizdə olan bütün fürsətlərdən yararlana bilmədik”, deyə Bellingem bildirib.
“Real”ın hücumameyilli yarımmüdafiəçisi komanda yoldaşı, fransalı ulduz hücumçu Kilian Mbappenin bu oyunda penaltini qaçırmasına da münasibət bildirib:
“Mbappenin qaçırdığı penalti? Belə də olur. Penaltinin qaçırılması məğlubiyyətimizin səbəbi deyil. Komanda olaraq kifayət qədər yaxşı deyildik, onlar daha yaxşı oynadılar”.
Xatırladaq ki, Cud Bellingem “Real”a 2023-cü ilin iyun ayının əvvəlində Dormund “Borussiya”sından keçib. “Kral klubu” ingilis yarımmüdafiəçinin transferi müqabilində 103 milyon avro məbləğində xərc çəkib. Cud İspaniya nəhəngi ilə müddəti 2029-cu ilin iyun ayının sonuna qədər qədər nəzərdə tutulmuş müqaviləyə imza atıb.
Gənc ingilis futbolçunun Madrid klubundakı çıxışı elə, ilk mövsümdəcə uğurlu alınıb. 2023/2024-cü illər mövsümündə Bellingem “Real”ın heyətində bütün yarışlarda 42 oyuna çıxıb, 23 qol və 13 məhsuldar ötürmə ilə fərqlənib.
Cari mövsümdə isə Bellingem “Real” üçün 15 oyun keçirib, 2 qol vurub, 4 məhsuldar ötürmə verib. Hücumameyilli yarımmüdafiəçinin “Real”ın heyətindəki ümumi göstəriciləri belədir: 57 oyun, 25 qol və 17 məhsuldar ötürmə.
Bellingem elə, ilk mövsümündəcə “Real”la İspaniya Super Kubokunun (2024), İspaniya La Liqasının (2023/2024), UEFA Çempionlar Liqasının (2023/2024) və UEFA Super Kubokunun (2024) qalibi olub.
Cud Bellingem 2020-ci ilin noyabr ayında debüt etdiyi İngiltərə yığmasının heyətində 40 oyun keçirib, 6 qol vurub və 9 məhsuldar ötürmə verib.
“Transfermarkt” internet-portalı 21 yaşlı ingilis yarımmüdafiəçinin transfer dəyərini 180 milyon avro məbləğində qiymətləndirir.
