Ukrayna Prezidenti Vladimir Zelenski amerikalı podkaster Leks Fridmana verdiyi müsahibədə ABŞ-ın yeni prezidenti Donald Trampın Ukraynaya uçan ilk dünya lideri ola biləcəyini qeyd edib.
Teleqraf.com xəbər verir ki, Zelenski Ukraynanın hava limanlarının yenidən açılması üçün müharibənin dayandırılması və güclü hava hücumundan müdafiə sistemlərinin olmasının vacibliyini qeyd edib.
Zelenski bildirib ki, hazırda hava limanlarına müdafiə sistemləri yerləşdirmək mümkün deyil: “İnsanları qorumaq təyyarələrdən daha vacibdir. Düşünürəm ki, müharibə bitəndə, Trampın Ukraynaya gəlməsi simvolik bir addım ola bilər.”
Zelenski Trampın Ukraynada müharibəni dayandırmaq üçün real imkanlara malik olduğuna inamını etiraf edib: "Trampın Ukrayna ilə bağlı qərarları təkcə ABŞ üçün deyil, həm də Avropa üçün böyük əhəmiyyət kəsb edir. Onun təklif etdiyi təhlükəsizlik zəmanətləri Ukrayna üçün güclü bir zəmin yarada bilər. Trampın Ukrayna üçün təhlükəsizlik zəmanətləri təqdim etməsindən sonra, Rusiya ilə müharibənin başa çatdırılması məsələsi müzakirə oluna bilər. Ukrayna NATO-ya daxil olarsa, alyans Kiyevin nəzarətində olan ərazilərdə fəaliyyət göstərə bilər. Bu, böyük bir uğur olmasa da, müharibənin diplomatik yolla həlli üçün birinci addımdır".
