İran Britaniyanın üç İran vətəndaşı və bir qurumuna qarşı son sanksiyalarına cavab olaraq çərşənbə axşamı Britaniyanın müvəqqəti işlər vəkilini çağırıb.
Bakıvaxtı.az "İRNA"ya istinadən xəbər verir ki, bu barədə İran Xarici İşlər Nazirliyinin Qərbi Avropa Departamentinin direktoru Məcid Nili Əhmədabadi məlumat verib.
O, Britaniyanın yeni hökumətinin əməkdaşlıq və qarşılıqlı fəaliyyət siyasətinə zidd olan sanksiyalarını pisləyib.
"İngiltərənin İsrailin fələstinlilərə qarşı hərəkətlərini və İsrailin baş naziri Bünyamin Netanyahunu dəstəkləməsi regional qeyri-sabitliyə töhfə verir", - deyə İran rəsmisi vurğulayıb.
Böyük Britaniyanın müvəqqəti işlər vəkili İranın narahatlığının Britaniya hökumətinə çatdırılacağını bildirib.
Qeyd edək ki, London Həmid Fazeli, Behnam Şəhriyari, Abdolfatah Anvazian və İranın Qüds Qüvvələrinə qarşı sanksiyalar tətbiq edib. Britaniya hökuməti bu şəxsləri və təşkilatı İsrail, İraq, Yəmən, Livan, Böyük Britaniya və digər ölkələrdə sabitliyi pozmağa yönəlmiş fəaliyyətlərə dəstək verməkdə ittiham edib.
Gülşən Şərif
