Yaşı 30-dan az olan amerikalı seçicilərin yarısı noyabrda keçiriləcək prezident seçkilərində ABŞ-nin vitse-prezidenti və Demokratlar Partiyasından namizəd Kamala Harrisə səs verməyə hazırdır, gənc seçicilərin üçdə biri isə Respublikaçılar Partiyasının namizədi Donald Trampı dəstəkləmək niyyətindədir.
Redaktor.az xəbər verir ki, bunu SurveyMonkey-in NBC üçün keçirdiyi sorğunun məlumatları sübut edir.
Araşdırmanın nəticələrinə görə, qeydiyyatdan keçmiş seçicilərin 50%-i Harrisə, 34%-i Trampa, daha 6%-i başqa namizədi dəstəkləməyə, respondentlərin 10%-i səs vermək niyyətində deyil.
Respondentlərin təxminən dörddə üçü (73%) prezidentliyə namizədlər üçün maksimum yaş həddinin tətbiqinin, onların 54 faizi isə yaşın 65 ilə məhdudlaşdırılmasının tərəfdarı olduğunu bildirib.
Sorğu avqustun 23-dən 30-dək aparılıb və 18-29 yaş arası qeydiyyatda olan 2617 seçicinin iştirakı ilə keçirilib. Tədqiqatın 3,1 faiz bəndi səhv marjası var. ABŞ-də bu yaş qrupunda təxminən 52 milyon insan var. Harvard Universitetinin yazda apardığı araşdırmaya görə, 18-29 yaşlı gənclərin yarıdan çoxu prezident seçkilərində səs vermək niyyətindədir. Ölkədə vətəndaşların 18 yaşından etibarən səsvermə hüququ var. 2020-ci ilin məlumatlarına görə, 2020-ci il ABŞ prezident seçkilərində 252,3 milyon belə amerikalı var idi.
Qeyd edək ki, ABŞ-də növbəti prezident seçkiləri noyabrın 5-də keçiriləcək. Demokratlar Partiyasının hazırkı prezident Co Bayden tərəfindən təmsil olunacağı güman edilirdi, lakin onun Donald Trampla iyun debatındakı fəlakətli çıxışından sonra Demokratlar arasında Baydenin mübarizədən əl çəkməsi üçün çağırışlar daha da gücləndi. İyulun 21-də o, yarışdan çıxmaq qərarına gəldi və Harrisin ölkənin ən yüksək dövlət vəzifəsinə namizədliyini dəstəklədi. Tramp Respublikaçılar Partiyasından prezidentliyə namizəd kimi irəli sürüləcək.
Turan İSMAYIL
