Rusiya Kamala Harrisi dəstəkləyəcək

Rusiya prezidenti Vladimir Putin Şərq İqtisadi Forumunun plenar iclasındakı çıxışında bir sıra aktual beynəlxalq mövzulara toxunub. Cənab Putin Ukrayna ilə danışıqların pesrpektivindən danışıb. Bundan başqa, o, ABŞ-də noyabr ayında keçiriləcək prezident seçkilərində demokratların namizədi Kamala Harrisi dəstəkləməyə çağırıb.

Şərq İqtisadi Forumu Rusiyanın Uzaq Şərqinə xarici investisiyaların stimullaşdı­rılması və Asiya-Sakit okean regionunda iqtisadi əməkdaşlığın inkişafı məqsədi ilə hər il Vladivostokda keçirilir. Forumda iqtisadi məsələlərlə yanaşı, aktual bey­nəlxalq mövzulara da toxunulur. Bu dəfə də istisna olmadı. Rusiya prezidenti Vladi­mir Putin çıxışında Ukrayna ilə danışıqlar barədə fikirlərini açıqladı. Kremlin sahibi vurğuladı ki, Rusiya Ukrayna ilə danışıq­lara razıdır, ancaq danışıqlar 2022-ci ildə İstanbulda əldə olunan razılaşmalar əsasın­da aparılmalıdır. Onun sözlərinə görə, əv­vəllər bu razılaşmalar Ukrayna üçün uyğun idi, lakin ölkə hakimiyyəti Qərbin göstərişi ilə bundan imtina etdi.

Putinin sözlərinə görə, 2022-ci ilin martında İstanbulda keçirilən danışıqlarda Rusiya və Ukrayna nümayəndə heyətləri “mümkün sülh sazişinin demək olar ki, bütün parametrləri”ni razılaşdıra bilmiş­dilər. Onun sözlərinə görə, razılaşma şərt­lərini Ukrayna nümayəndə heyətinin rəh­bəri David Araxamiya da təsdiqləmişdi: “Bəli, hələ də yekunlaşdırılmalı olan bəzi məqamlar var idi, amma ümumilikdə viza qalır, bu sənəddir. Sonra cənab Conson gəldi (Boris Conson danışıqlar zamanı Bö­yük Britaniyanın baş naziri vəzifəsini icra edirdi – XQ), məlum olduğu kimi, Brita­niya hakimiyyət orqanları bunu təsdiqləyir və ukraynalılara sonuncu ukraynalıya qə­dər döyüşmək göstərişi verir. Bu gün bun­lar Rusiyanın strateji məğlubiyyətinə nail olmaq üçün baş verənlərdir”.

Xatırladaq ki, İstanbul sazişləri pake­tinə Ukraynanın NATO-ya üzv olmaqdan və nüvə silahı hazırlamaqdan imtinası da daxil idi. Rusiya ilə danışıqlarda Ukray­na nümayəndə heyətinə başçılıq edən Ali Radada “Xalqın qulluqçusu” fraksiyası­nın lideri David Araxamiya demişdi ki, 2022-ci il İstanbul danışıqlarında Rusiya nümayəndə heyəti Ukraynanın NATO-ya üzv olmaqdan imtina edəcəyi təqdirdə müharibəni dayandırmağı təklif etmişdi. Ukrayna nümayəndələrinin niyə bu tək­lifi qəbul etmədiyi sualına cavab olaraq, cənab Araxamiya bildirmişdi ki, bunun üçün Ukraynanın NATO-ya üzv olacağı­nı bildirən Konstitusiyanın dəyişdirilməsi tələb olunacaqdı. Bundan əlavə, siyasətçi açıqlamışdı ki, Ukrayna hakimiyyəti rusla­ra etibar etmir: “Rusların bunu edəcəyinə inam yox idi. Bu, yalnız təhlükəsizlik tə­minatları olduqda edilə bilərdi... Üstəlik, biz İstanbuldan qayıdanda Boris Conson Kiyevə gəldi və dedi ki, biz onlarla ümu­miyyətlə, heç nə imzalamayacağıq və gəlin vuruşaq”. 

Rusiya lideri forumda dünyanın diqqət­lə izlədiyi ABŞ prezident seçkilərinə mü­nasibətini də açıqlayıb. V.Putin prezident seçkilərində Kremlin favoritinin ABŞ-nin hazırkı prezidenti Co Baydenin olduğunu bildirib, lakin o, seçkilərdə iştirakdan im­tina etmək qərarına gəldiyindən və tərəf­darlarını vitse-prezident Kamala Harrisi dəstəkləməyə çağırdığından, Kreml də bunu edəcək: “Favoritlərə gəlincə, bunu müəyyən etmək bizim işimiz deyil. Bu, hələ də Amerika xalqının seçimidir. Dedim ki, bizim sevimli, belə demək mümkünsə, indiki prezident cənab Bayden idi. O, ya­rışdan kənarlaşdırıldı, lakin bütün tərəfdar­larını xanım Harrisi dəstəkləməyə təşviq etdi. Biz də bunu edəcəyik – onu dəstək­ləyəcəyik. Bu, ilk növbədə. İkincisi, o, çox ifadəli və yoluxucu şəkildə gülür. Bu o deməkdir ki, onda hər şey yaxşıdır”.

Rusiya prezidenti qeyd edib ki, indi yenidən dövlət başçısı postuna iddialı olan ABŞ-nin 45-ci prezidenti Donald Tramp ondan əvvəl heç bir Amerika prezidenti­nin tətbiq etmədiyi qədər sanksiya tətbiq edib. “Əgər xanım Harris yaxşı işləyirsə, o zaman, bəlkə də, bu cür hərəkətlərdən çəkinəcək. Son nəticədə seçim Amerika xalqının ixtiyarındadır və biz bu seçimə hörmətlə yanaşacağıq”, – deyə cənab Putin əlavə edib. 

S.ELAY
XQ