“Mançester Siti”nin ispan dayaq yarımmüdafiəçi Rodri maraqlı bir açıqlaması ilə futbol ictimaiyyətinin diqqətini çəkib.
Arena.az “Mundo Deportivo” nəşrinin “Players Tribune” dərgisinə istinadı əsasında məlumat verir ki, əvvəllər Madrid “Atletiko”sunda çıxış etmiş futbolçu “döşəkçilər”in argentinalı baş məşqçisi Dieqo Simeonenin rəhbərliyi altında iş təcrübəsini maraqlı xüsuslarla xatırlayıb:
“Vilyarreal”dan “Atletiko”ya bir mövsümlük qayıdanda rəqabət qabiliyyətinin əslində nə demək olduğunu öyrəndim. “Villarreal”da topa çox yaxşı nəzarət edirdim, amma yenə də olduqca yumşaq idim. Dieqo Simeonedən mən pis oğlan olmağın və meydanda bir az da əclaf olmağın nə demək olduğunu öyrəndim. Rəqibin oyununu 90 dəqiqəlik qarma-qarışıqlığa çevirməyin necə bir şey olduğunu da öyrəndim. Bu, daha bir vacib məqam idi”, deyə yarımmüdafiəçi vurğulayıb.
Əlavə edək ki, Dieqo Simeone özü hələ futbolçu ikən meydanda “qara iş”in ustalarından biri kimi tanınırdı. Məşqçilik fəaliyyətinə başlayandan isə argentinalı mütəxəssis dağıdıcı xüsuslu oyun oynamaq bacarığını çalışdırdığı kollektivlərə də yeritməyi bacarıb.
Xatırladaq ki, Rodri Madrid “Atletiko”sunun yetirməsidir, ispan “dayaqçı” 2007-2013-cü illərdə “döşəkçilər”in klub sistemində olub. Daha sonra o, “Vilyarreal”a keçib. Ancaq 2018-ci ildə yarımmüdafiəçi 2019-cu ilə qədər oynadığı “Atletiko”ya qayıdıb.
Rodri hazırda çıxış etdiyi “Mançester Siti”yə 2019-cu ilin iyulunda 70 milyon avro müqabilində elə, “Atletiko”dan keçib. Rodrinin “Mançester Siti” ilə müqaviləsi 2027-ci ilin iyun ayının sonuna qədər qüvvədədir.
Rodri “Mançester Siti” ilə İngiltərə Premyer Liqasının (2020/2021, 2021/2022, 2022/2023, 2023/2024), İngiltərə Kubokunun (2023), İngiltərə Liqa Kubokunun (2020, 2021), İngiltərə Super Kubokunun (2020), Çempionlar Liqasının (2022/2023), UEFA Super Kubokunun (2023/2024), FIFA Klub Dünya Kubokunun (2024) qalibi olub. Rodri həmçinin Çempionlar Liqasında 2022/2023-cü illər mövsümünün oyunçusu seçilib.
Rodriqo Ernandes 2018-ci ilin martında debüt etdiyi İspaniya yığmasının heyətində 56 oyun keçirib, 4 qol vurub, 2 məhsuldar ötürmə verib. Rodri İspaniya yığması ilə 2023-cü il UEFA Millətlər Liqasının və 2024-cü il Avropa çempionatının qalibi olub.
