Möhtərəm Edinburq Universiteti Ukrayna və Suriyadakı müharibələr haqqında sistematik şəkildə Rusiyanın açıq-aşkar dezinformasiyasını yayan bir politoloqu təbliğat kursu öyrətmək üçün rəhbər təyin etdikdən sonra Böyük Britaniyada böyük qalmaqal yaranıb.
Qaynarinfo xəbər verir ki, bu barədə The Times yazır.
"Akademik Tim Hayvord avtoritar rejimlər haqqında dezinformasiya xarakterli narrativlərə yol verdiyinə görə tələbələr, ekspertlər və siyasətçilər tərəfindən dəfələrlə tənqid olunub”, - nəşr yazır.
Məsələn, o, iddia edib ki, 2022-ci ildə mühasirədə olan Mariupolda dinc sakinlərlə, xüsusən də uşaqlarla dolu dram teatrı Rusiyanı gözdən salmaq üçün Ukrayna Silahlı Qüvvələri tərəfindən partladılıb. O, həmçinin Suriyanın üsyançıların nəzarətində olan ərazilərdə dinc əhaliyə qarşı qaz hücumlarının Əsəd rejimi tərəfindən deyil, "Ağ Dəbilqəlilər” kimi tanınan yerli mülki xilasetmə könüllüləri tərəfindən həyata keçirildiyi barədə rus uydurmasını da təbliğ edib.
Hayvord prezident Putin rejiminin "faydalı axmağı" olduğunu inkar edib və sadəcə olaraq münaqişə zonalarından "hər iki tərəfi" eşitmək istədiyini təkid edib. Lakin onun "demokratiyalarda təbliğat və senzura” kursunu tədris etməyə təyin olunması təkcə Şotlandiya alimlərini deyil, həm də siyasətçiləri təəccübləndirib.
Sovet dissidentləri ilə işləyən yeni Leyborist deputatı Bleyr Makduqal qeyd edib ki, Putin Rusiyası liberal demokratiyalara qarşı çılpaq informasiya müharibəsi aparır.
"Universitetlərimiz bu dezinformasiyaya qarşı dayanıqlılığın yaradılmasında və cəmiyyətimizi onun aşındırıcı təsirlərindən qorumaqda mühüm rol oynamalıdır. Bu, bizim milli təhlükəsizliyimizə aiddir. Əsl narahatlıq ondan ibarətdir ki, qəddar diktaturaların yaratdığı təbliğatı heç şübhəsiz yayan uzun tarixə malik bir alimin tələbələrə dezinformasiya öyrətməsidir" - o vurğulayıb.
Digər britaniyalı deputat Stiven Getins də bu fikirdədir. O vurğulayıb ki, universitetlər "siyasi və geniş diskursumuzda görünən dezinformasiyaya qarşı antidot olmalıdır".
Hayvordın özünün hələ ki, təyinatı ilə bağlı ictimaiyyətə açıqlama verməyə vaxtı olmayıb, lakin o, əvvəllər Qərbin Rusiyanın dezinformasiyasının təhlükəsini şişirtdiyini iddia edib. "Dezinformasiya ilə" mübarizə" cəhdləri cəmiyyətin demokratik institutları üçün dezinformasiyanın özündən daha böyük təhlükə yarada bilər", - o deyib.
Edinburq Universiteti yeni təyinatla bağlı heç bir problem görmədiyini bildirib.
"Biz ləyaqət və hörmət siyasətimiz çərçivəsində icma üzvlərimizin çətin mövzuları qanuni şəkildə müzakirə və mühakimə edə bildiyi təhlükəsiz mühit yaratmaqla ifadə azadlığını və akademik azadlığı dəstəkləməyə sadiqik”, - universitetdən deyilib.
UNIAN qeyd edir ki, Rusiya Avropada genişmiqyaslı informasiya və psixoloji əməliyyat keçirir, siyasətçiləri, iş adamlarını, jurnalistləri və digər nüfuzlu şəxsləri manipulyasiya etməyə çalışır. Məqsəd Avropa ilə Amerika arasında çəkişmə yaratmaq və Ukraynaya dəstəyi sarsıtmaq cəhdidir.
Almaniya Rusiya təbliğatına ən həssas olan ölkə olub. Rusların səyləri artıq əməli nəticəsini verməkdədir: yerli seçkilərdə sağ və solçu populistlər orada çoxlu səs toplayır, Ukraynaya yardımı dayandırmağa və Rusiyaya qarşı sanksiyaları ləğv etməyə açıq çağırış edirlər.
Alpər
