Böyük maraqla qarşılanan Azərbaycan startapı iş adamlarından təcili dəstək istəyir

"1 milyonluq mükafatı udmaq üçün qarşımızda dayanan tək əngəl maddi problemdir. Xaricdə və Azərbaycanda yaşayan iş adamlarını layihəmizi dəstəkləməyə çağırırıq. Bu mərhələni də uğurla keçsək artıq startapımızın önündə heç bir maneə qalmayacaq və biz "unicorn" şirkətə çevrilmə istiqamətində sürətli addımlar atacağıq".
Azərbaycanı dünyada keçirilən müxtəlif elm, texnologiyalar və startap müsabiqələrində təmsil edən "SkyBee" dron komandası son zamanlar qazandığı uğurlar səbəbi ilə ABŞ-da keçiriləcək Dünya Startap Kubokunun "Grand Final" mərhələsinə dəvət olunub. Startap komandası son 1 il ərzində göstərdiyi uğurlu fəaliyyəti ilə bağlı dünyadan bir çox şirkətin və investorların diqqətini öz üzərinə cəlb edib. Burada komandanın Londonun, Budapeştin və Varşavanın startap eko-sistemlərində göstərdiyi performanslar və ən son Pakistanın Lahore şəhərində regional çempionatda qazandığı birincilik faktoru xüsusi rol oynayır. Komanda Amerika və Mərkəzi Avropa ölkələrindən olan investorlardan onların eko-sistemlərində şirkət qurmaq şərti ilə investisiya təklifləri alıblar.
Xeberler.az-ın məlumatına görə, “SkyBee” startapının təsisçisi Tural İsmayılzadə Marja.az-a bildirib ki, ABŞ-da keçiriləcək Dünya Startap Kubokunda 1 milyon dollar dəyərində mükafatı udmaq üçün qarşımızda dayanan tək əngəl maddi problemdir. O, Dünya kubokuna vəsiqə qazanan komandamız iş adamlarını onlara dəstək verməyə çağırır: "Bizə qısa müddət ərzində dəstək verilməsini istəyirik".
Tural İsmayılzadə qeyd edib ki, komanda bu mərhələyə gəlmək üçün 3 il sərf edib:
"Bugün həyatımızın bəlkə də ən kritik dönəmindəyik. Bu mərhələni də uğurla keçsək artıq startapımızın önündə heç bir maneə qalmayacaq və biz "unicorn" şirkətə çevrilmə istiqamətində sürətli addımlar atacağıq. Bu təkcə bizim deyil, region gənclərinin də gələcəyinə güclü təsir edəcək. Bizim müsabiqəyə qatılmaq üçün sadəcə 6 gün vaxtımız var. Viza və təyyarə biletlərin alınmasının, çap məhsullarının hazırlanmasının və müsabiqəyə hazırlaşmağın müəyyən bir vaxt aldığını nəzərər alaraq bizim proseslərə təcili başlamağımız lazımdır. Biz əlimizdə olan bütün resursları həm dronun hazırlanmasına və sınağına, həm də Pakistanda keçirilən beynəlxalq müsabiqəyə qatılmağa sərf etmişik. Bizim Amerikaya olan səfərimizin maddi cəhətdən qarşılanması lazımdır. Bu səbəblə xaricdə və Azərbaycanda yaşayan iş adamlarını layihəmizi dəstəkləməyə çağırırıq. Biz müsabiqədə ölkəmizin bayrağını yüksəldəcəyimizə əminik. Bunu daha öncə də etdik, bir ay öncəki nəticələrimiz göz önündədir.
Bizim dünyada tanınan iş adamlarımız var. Onların Azərbaycan gənclərinə etdiyi müxtəlif dəstəkləri dəfələrlə görmüşük. Bu səbəbdən layihəmizin həm dünya, həm ölkəmiz üçün əhəmiyyətini, həm də startapımız üçün kritik dönəm olmasını nəzərə alaraq, 2 gün ərzində bizə dəstək vermələrini rica edirik. Bizə dəstək veriləcəyi təqdirdə hazırladığımız dron prototipinin ABŞ-ın San-Fransisko şəhərinə aparılması istiqamətində aidiyyatı üzrə dövlət qurumlarının da xüsusi həssaslıq göstərməsini və dronun müsabiqədə iştirakının təmin edilməsini xahiş edirik”.
Dəstək göstərmək istəyən iş adamları [email protected] elektron poçt ünvanı və ya skylifeindustry.com saytı vasitəsilə əlaqə saxlaya bilərlər.
Qeyd edək ki, SkyBee vəhşi arı ailələrinin kütləvi ölümü nəticəsində təbii tozlandırma prosesinin pozulması və məhsuldarlığın aşağı düşməsi halları ilə mübarizə aparan dronlarla süni tozlandırma startapdır. BMT-nin statistikasına görə, 1992-ci ildən bugünə qədər bütün dünyada 85% vəhşi arı ailələrinin və digər həşaratların ölümünü nəzərə alarsaq, startapın dünya üçün çox böyük əhəmiyyət kəsb etdiyini görmək olar. Startapın apardığı tədqiqatlar bir çox ölkədə, o cümlədən Macarıstanda, İngiltərədə, Polşada, Braziliyada və ən son Pakistanda böyük maraqla qarşılanmışdır.