Azərbaycan bankları COP29 çərçivəsində "yaşıl" keçidin dəstəklənməsi üzrə öhdəlik götürüblər.
Day.Az xəbər verir ki, bu barədə Azərbaycan Mərkəzi Bankının (AMB) sədri Taleh Kazımov ADA Universitetində "Bakı İqlim dəyişmələri ilə mübarizə üzrə Fəaliyyət Həftəsi" çərçivəsində keçirilən "Özəl maliyyələşdirmə üçün şəraitin yaradılması" mövzusunda dəyirmi masada bildirib.
"Bizim üçün maliyyə sabitliyi son dərəcə vacibdir. Onsuz maliyyə sektoru "yaşıl" keçidi dəstəkləyə bilməz. Bu çox mühüm mövzudur. Maliyyə sektorunun digər iştirakçıları da konkret tədbirlərin qəbul edilməsinin vacibliyini dərk edirlər. Biz artıq bu istiqamətdə işləməyə başlamışıq. Ancaq güclərimizi birləşdirərək, "yaşıl" keçidə nail ola bilərik. Bankların ətraf mühitin mühafizəsi və iqtisadi artımın təmin edilməsi ilə bağlı öhdəlikləri var. Bütün çətinliklərə baxmayaraq, istifadə etməli olduğumuz bir çox imkanlar mövcuddur", - o qeyd edib.
T.Kazımov əlavə edib ki, Mərkəzi Bankda "yaşıl" keçidin məsuliyyətini anlayırlar.
"Bizim üçün maliyyə sabitliyi prioritet olaraq qalır, lakin biz bütün maliyyə sektorunu dəstəkləməyə borcluyuq. Biz COP29-a qədər bazara təqdim edəcəyimiz "yaşıl" maliyyələşdirmə üçün taksonomiya hazırlamışıq. Maliyyə institutları, xüsusilə banklar üçün yeni tövsiyələr hazırlanıb. Banklar maliyyə sektorunda 90 faiz paya sahib olduqları üçün yeni meyarlara uyğun hərəkət etməlidirlər", - o bildirib.
