Co Bayden, yaxın günlərdə Florida ştatını vuracağı gözlənilən Milton qasırğası səbəbindən oktyabrın 10-15-də Anqola və Almaniyaya planlaşdırılan səfərlərini təxirə salıb.
Bu barədə oktyabrın 8-də Ağ Evin mətbuat katibi Karine Jan-Pyer məlumat verib. Onun sözlərinə görə, Bayden təbiət hadisəsinə hazırlıq və eləcə də cənub-şərqdə “Helen” qasırğasına davam edən reaksiyaya nəzarət etmək üçün Ştatlarda qalacaq.
Ağ Evin saytında qeyd edildiyi kimi, Ağ ev rəhbəri oktyabrın 10-13-də Almaniyada olmalı və ölkə liderləri ilə görüşməli, həmçinin ilk dəfə olaraq o, oktyabrın 12-də ölkə və hökumət rəhbərləri səviyyəsində keçiriləcək Ramşteyn formatında Ukraynanın müdafiəsi üzrə təmas qrupunun iclasına sədrlik etməli idi. Almaniyanın “n-tv” telekanalının məlumatına görə, Almaniya hökuməti təmas qrupunun görüşündə Baydenin Ukraynaya gələcək hərbi dəstək barədə “güclü siqnal” verəcəyini gözləyirdi.
Ukrayna prezidenti Vladimir Zelenski təmas qrupunun görüşündə Ukraynanın qələbə planını tərəfdaşlarına təqdim etmək niyyətində olduğunu bildirib. O, bu görüşün xüsusi olacağını deyib.
Oktyabrın 8-də Bayden jurnalistlərə deyib ki, o, vəzifəsini tərk etməzdən əvvəl hələ də Almaniya və Afrikaya səfər etməyi planlaşdırır və “bu məsələ ilə sonra məşğul olacağını” deyib. O, səfərlə bağlı yeni vaxt təyin etmək üçün Almaniya kansleri Olaf Şolsa zəng etməyi planlaşdırır. “NBC News” aydınlaşdırıb ki, Baydenin Anqolaya səfəri onun prezident kimi Afrikaya ilk səfəri olacaq.
//Samir Qurbanov, Editor.az
