Dünyada nə qədər insan quraqlıqdan əziyyət çəkib? - ARAŞDIRMA

Quraqlıq və səhralaşma bir-biri ilə sıx əlaqəli olan ciddi ekoloji təhlükələrdir. Bu dəyişikliklər təbii olaraq baş versə də, meşələrin qırılması, urbanizasiya və yeraltı su ehtiyatlarının həddən artıq istismarı kimi insan fəaliyyəti ilə daha da şiddətlənir. Qlobal temperatur yüksəldikcə dünyanın bir çox yerlərində quraqlıqların tezliyi, müddəti və şiddətinin artacağı gözlənilir.

İqtisadiyyat.az-ın araşdırmasına görə, dünyada quraqlığın ən yüksək olduğu region Afrikadır.

Bu il dünya üzrə quraqlıq riskinə ən çox məruz qalan ölkə 9,9 risk indeksi balı ilə Somali olub. Namibiya və Zimbabve 9,4 risk indeksi balı ilə ikinci yerdə qərarlaşıb. Beləliklə, bu il dünyada quraqlıq təhlükəsinə ən çox məruz qalan 10 ölkədən beşi Afrikada yerləşir.

Araşdırmalara görə, ötən il dünya üzrə quraqlıqdan zərər çəkən və ya evsiz qalan insanların sayı təxminən 29,4 milyon nəfər təşkil edib. Son üç onillikdə quraqlığın qlobal təsiri 2002 və 2016-cı illərdə ən yüksək səviyyədə olub.

Quraqlıq, dünyanın istənilən bölgəsində baş verə bilən təbii iqlim fəlakətidir. Bu, su çatışmazlığı ilə nəticələnən yağıntıların olmaması ilə xarakterizə olunan yavaş başlayan fəlakətdir. Quraqlıq sağlamlıq, kənd təsərrüfatı, iqtisadiyyat, enerji və ətraf mühitə ciddi təsir göstərə bilər.

Qlobal miqyasda təqribən 55 milyon insan hər il quraqlıqdan təsirlənir.  Bu təbii fəlakət dünyanın demək olar ki, hər yerində heyvandarlıq və əkinçilik üçün ən ciddi təhlükədir. Quraqlıq insanların güzəranını təhdid edir, xəstəlik və ölüm riskini artırır, kütləvi miqrasiyaya təkan verir. Hazırda su qıtlığı dünya əhalisinin 40%-nə təsir edir. 2030-cu ilə qədər 700 milyona yaxın insan quraqlıq nəticəsində evlərini tərk etmək riski altındadır.

Gözəl Həşimova