Vətən müharibəsi şəhidi Rəhimov Zamin Vahid oğlunun anım günü keçirildi

09.20 2024-cü il tarixində Vətən müharibəsi şəhidi Rəhimov Zamin Vahid oğlunun anım günü münasibətilə Bakıxanov qəsəbəsində yerləşən Şəhidlər Xiyabanında mərasim keçirildi. Anım mərasimində AZQMƏVŞAİB Cəbrayıl rayon filialının sədri Səbuhi Hüseynov, filialın üzvləri, Cəbrayıl rayon İcra Hakimiyyətinin nümayəndələri Abbaslı Abbas Əfqan oğlu, Alməmmədov Zaman Sabir oğlu və şəhidin ailə üzvləri iştirak edərək, şəhidin məzarını ziyarət etmiş, ruhuna dualar oxumuşlar.

Rəhimov Zamin Vahid oğlu 21 aprel 1988-ci ildə Cəbrayıl rayonunun Məzrə kəndində anadan olmuşdur. O, 2006-cı ildə Binəqədi rayonundakı Sirik kənd tam orta məktəbini bitirdikdən sonra həqiqi hərbi xidmətə çağırılmış və 2008-ci ildə hərbi xidmətini başa vurmuşdur. Şuşa Musiqi Texnikumunu qarmon ifası üzrə bitirərək, 2013-cü ildən etibarən Cəbrayıl rayon Mahmudlu kənd Uşaq Musiqi məktəbində qarmon müəllimi kimi fəaliyyət göstərmişdir.

27 sentyabr 2020-ci il tarixində başlayan Vətən müharibəsi zamanı Zamin Rəhimov könüllü olaraq döyüşlərə qatılmış, 7 oktyabr 2020-ci il tarixində Cəbrayıl rayonu uğrunda gedən döyüşlərdə qəhrəmancasına şəhid olmuşdur. O, Azərbaycan Respublikası Prezidentinin Sərəncamı ilə ölümündən sonra “Vətən uğrunda”, “Cəbrayılın azad olunmasına görə”, “Füzulinin azad olunmasına görə” və “Cəsur döyüşçü” medalları ilə təltif edilmişdir.

Şəhidlərimizin xatirəsi daim yaşayacaqdır, onların qəhrəmanlığı Vətənimizin qürur mənbəyidir. Allah bütün şəhidlərimizə rəhmət eləsin!