ABŞ-də Demokratlar Partiyasından prezidentliyə namizəd Kamala Harris Respublikaçı namizəd Donald Trampın “Qadınları istəsələr də, istəməsələr də qoruyacağam” ifadəsini “təhqiredici” kimi qiymətləndirərək reaksiya verib.
"Cebheinfo.az"-ın “CBS News”-a istinadən verdiyi məlumata görə, Harris Arizona ştatının Phoenix şəhərində keçirilən mitinqdə Trampın istifadə etdiyi ifadələri “təhqiredici” adlandırıb.
"O, qadınların azadlığına və zəkasına hörmət etmir ki, özləri üçün nəyin daha yaxşı olduğunu bilsinlər və buna uyğun qərar versinlər. Amma biz qadınlara güvənirik", - Harris deyib.
Viskonsin ştatının Green Bay bölgəsində keçirilən mitinqdə Tramp Prezident Co Bayden və onun müavini Kamala Harrisin administrasiyasının ölkəyə “cinayətkar mühacirləri idxal etdiyini” və bu şəxslərin “qadın və qızlara hücum etdiyini, təcavüz etdiyini və öldürdüyünü” iddia edib.
Komandasının ona “qadınları qoruyacağam” ifadəsini işlətməyin yersiz olacağını söylədiyini ifadə edən Tramp, “İstəsələr də, istəməsələr də qadınları qoruyacağam” deyib.
