Moldova sosialistləri Sandunun əsasən xaricdə səsvermə əsasında qələbəsini tanımır.
Qaziler.az xarici mətbuata istinadən bildirir ki, Moldova Sosialistlər Partiyası bazar ertəsi, noyabrın 4-də respublikanın prezident seçkilərində xarici seçki məntəqələrində keçirilən səsvermənin nəticələrini tanımaqdan imtina edib, çünki bu, ölkənin hazırkı prezidenti Maya Sandunun qələbəsinə səbəb olub. Partiya bunu qeyri-qanuni hesab edir.
“Moldova Respublikasının Sosialistlər Partiyası xarici seçki məntəqələrində keçirilən səsverməni tanımır, bunun sayəsində Sandu seçkilərin qalibi elan edilib”, – siyasi qüvvə öz Telegram kanalında bildirib.
Partiyaya görə, Sandu qeyri-legitim prezidentdir, onun rəqibi, namizədliyi sosialistlər tərəfindən irəli sürülən keçmiş baş prokuror Aleksandr Stoyanoqlo isə xalqın prezidentidir.
Siyasi qüvvənin məlumatına görə, Stoyanoqlo Moldova ərazisində yerləşən, ölkədə yaşayan və işləyən, orada vergi ödəyən və uşaqlarını böyüdən insanların səs verdiyi seçki məntəqələrində 51,19% səs toplayıb. Partiya qeyd edib ki, Sandu qələbəsi sayəsində respublika əhalisi özlərini qarət edilmiş və aldadılmış hiss edir.
Xatırladaq ki, bir qədər əvvəl Moldova Mərkəzi Seçki Komissiyası Sandu prezident seçkilərində 55,33 faiz səslə qalib gəldiyini elan edib.
QAZİLER.AZ
