İstanbulda keçirilən 41-ci Beynəlxalq Kitab Sərgisi çərçivəsində Beynəlxalq Türk Mədəniyyəti Təşkilatı – TÜRKSOY tərəfindən Türkiyə türkcəsində ərsəyə gətirilən “Aşıq Mikayıl Azaflı” şeirlər kitabının təqdimatı olub.
AZƏRTAC xəbər verir ki, XX əsr Azərbaycan aşıq sənətinin görkəmli nümayəndəsi və şair Mikayıl Azaflının anadan olmasının 100 illik yubileyi münasibətilə hazırlanan nəşrdə ustadın əsasən aşıqların repertuarından düşməyən, dillərdə əzbər olan poeziya nümunələri yer alıb. Kitabda şeirlərin aşıq tərəfindən əl ilə yazılmış nümunələri və böyük sənətkara aid fotoşəkillər təqdim edilib.
Təqdimat mərasimində çıxış edənlər aşığın həyat və yaradıcılığından danışıb, onun Azərbaycanın saz sənətinin tanınması və inkişafındakı əvəzsiz xidmətlərindən bəhs ediblər.
TÜRKSOY-un Baş katibi Sultan Rayev bildirib ki, ortaq mədəni irsimizdən biri olan aşıq sənəti bütün dövrlərdə əbədi əsərlər ortaya qoyan böyük şəxsiyyətlər yetişdirib. Bu sənətçilərin əsərlərinin vaxt ötdükcə daha da dəyər kəsb etdiyinə və sonrakı nəsillərə yol göstərici olduğuna inanılıb. Bu böyük şəxsiyyətlərdən biri də Azərbaycan türklərinin tanınmış aşığı, Türk dünyasının böyük söz ustadı Aşıq Mikayıl Azaflıdır. TÜRKSOY Aşıq Mikayıl Azaflı sənətini Türkiyədəki sənətsevərlərə tanıtmaq üçün onun seçilmiş şeirlərini Türkiyə türkcəsinə tərcümə edərək yayımlamağı qərara alıb və belə bir möhtəşəm kitab hazırlayıb.
Nəşrdə Azərbaycan Aşıqlar Birliyinin sədri Əməkdar elm xadimi, professor Məhərrəm Qasımlının “Sazın-sözün qoca qartalı” başlıqlı məqaləsi və “Ön söz”ün müəllifi Azaflı Sosial Yardım və Mədəniyyət Dərnəyinin sədri Arzuman Azaflının fikirləri yer alıb.
Kitabın elmi redaktoru Azərbaycanın TÜRKSOY-dakı daimi nümayəndəsi Elçin Qafarlı, tərtibatçısı Ezgi Orludur. Nəşrdə yer alan şeirləri Türkiyə türkcəsinə Zehra Işık çevirib.
Xatırladaq ki, Azərbaycan 41-ci İstanbul Beynəlxalq Kitab Sərgisində fəxri qonaq qismində Mədəniyyət Nazirliyimizin təşkilatçılığı ilə olduqca geniş heyətlə iştirak edir.
