ABŞ-da baş tutacaq prezident seçkiləri ərəfəsində beynəlxalq birjalarda volatillik artıb. Ötən gün EUR/USD valyuta cütlüyü 1.0914 səviyyəsini test etdikdən sonra, bugün 1.0876 səviyyəsinə qədər ucuzlaşıb.
USD/JPY valyuta cütlüyü isə eyni dövr ərzində 151.530 həddindən 152.500 həddinə kimi bahalaşıb.
Qızıl 2724$ səviyyəsinə qədər geriləsə də, bir qədər bahalaşaraq 2735$ səviyyələrində ticarət olunur.
Bugün səhər Avstraliya Ehtiyatlar Bankı uçot faiz dərəcəsini 4.35% səviyyəsində saxladığını bildirib. Bunun fonunda AUDUSD cütlüyü bahalaşıb və hal-hazırda 0.6597 səviyyəsində ticarət olunur.
Neftin qiyməti 75$-ın üzərində möhkəmlənməyə çalışır. “Brent” markalı neftin bir barreli 75.5$ səviyyəsində qərarlaşıb.
“Bitcoin” isə son on gün ərzində əldə etdiyi dəyəri demək olar ki itirib. Token ötən gün ərzində 66820$ səviyyəsinə qədər ucuzlaşıb.
Bazar ertəsi günü Almaniyada və Avrozonada biznes aktivliyinə dair göstəricilər dərc olunub. Belə ki, Almaniyanın Sənaye Sektorunda Biznes Aktivliyi İndeksi (PMI) sentyabr ayı ilə müqayisədə oktyabr ayında 40.6 bənd səviyyəsindən 43 bənd səviyyəsinə qədər yüksəlib, Avrozonanın sənaye sektorunda PMI isə oktyabr ayında 45 bənddən 46 bəndədək yüksəlib. Analitiklər göstəricinin 45.9 bəndədək yüksələcəyini ehtimal edirdilər. Həmçinin, ABŞ-da Sənaye Sektorunda Sifarişlərin Həcmi avqust ayı ilə müqayisədə sentyabr ayında 0.5% azalıb.
Gün ərzində açıqlanacaq Böyük Britaniyanın Xidmət Sektorunda Binzes Aktivliyi İndeksi, ABŞ-da İdxal, İxrac, Ticarət Saldosu və xidmət sektorunda PMI göstəriciləri Amerikada baş tutacaq prezident seçkilərindən savayı investorların diqqət mərkəzində olacaq əsas xəbərlərdir.
Məlumat İnvest-AZ İnvestisiya Şirkətinin analitikləri tərəfindən hazırlanıb.
