“Kolo-Kolo”nun çilili mərkəz yarımmüdafiəçisi Arturo Vidal və futbolçunun bəzi komanda yoldaşları cinsi təcavüzdə təqsirləndirilirlər.
Arena.az bu barədə ADN telekanalına istinadən məlumat verir.
Mənbənin məlumatına görə, hadisə Çilinin paytaxtı Santyaqo şəhərinin şəhər kommunalarından biri Vitakuradakı barların birində baş verib. Təcavüzün qurbanı narkotik vəsitənin təsiri altında olub və daha sonra Vidal tərəfindən cinsi təcavüzə məruz qalıb. Vidaldan başqa bu iyrənc əməldə “Kolo-Kolo”nun bir neçə idmançısının da adı hallanır.
Hüquq-mühafizə orqanlarının araşdırmaya başladığı bildirilir. Vidal şəxsiyyətinin yoxlanılması üçün polis bölməsinə aparılıb. Hadisə ilə bağlı istintaq davam edir.
Vidal karyerası ərzində Leverkuzen “Bayer”i, “Yuventus”, “Bayern”, “Barselona”, “İnter”, “Flamenqo” və “Atletiko Paranaense”də çıxış edib.
Cari ilin yanvarında Vidal azad agent qismində doğma klubu “Kolo-Kolo”ya qayıdıb və şahlara layiq təmtəraqla ictimaiyyətə təqdiim edilib. Vidal “Kolo-Kolo” ilə müddəti cari ilin dekabr ayının sonuna qədər qüvvədə olacaq müqavilə imzalayıb.
Cari mövsümdə Vidal “Kolo-Kolo”nun heyətində 34 oyuna çıxıb, 7 qol və 3 məhsuldar ötürmə ilə fərqlənib.
Klub karyerası boyunca Vidal çoxsaylı qənimətlər qazanıb, həmçinin 2016-cı ildə Çilidə ilin futbolçusu seçilib.
Arturo Vidal 2007-ci ilin fevralında debüt etdiyi Çili yığmasının heyətində 142 oyuna çıxıb. Arturo bu oyunlarda 34 qol və 9 məhsuldar ötürmə ilə fərqlənib. Vidal Çili yığması ilə 2 dəfə Amerika Kubokunun (2015, 2016) qalibi olub.
“Transfermarkt” internet-portalı 37 yaşlı veteran yarımmüdafiəçinin transfer dəyərini 300 min avro məbləğində qiymətləndirir.
