Əksəriyyəti Donald Trampa məxsus olan “Trump Media & Technology Group” şirkətinin səhmlərinin qiyməti ABŞ prezident seçkilərinin ilkin nəticələri fonunda yüksəlib.
Marja.az xəbər verir ki, "Truth Social" sosial şəbəkəsini idarə edən "Trump Media & Technology Group"un (DJT) səhmləri 6 noyabr Çərşənbə günü NASDAQ birjasında premarket ticarəti zamanı 62,02% dəyər qazanaraq bir səhm üçün 54,99 dollara çatıb.
ABŞ-da keçirilən prezident seçkilərinin ilkin nəticələri fonunda səhmlərinin nəzarət paketi Donald Trampa məxsus olan media holdinqin səhmlərinə tələbat artıb.
Noyabrın 5-də ABŞ-da 60-cı prezident seçkiləri keçirilib. Bu posta namizədliyi Respublikaçılar Partiyasından irəli sürülmüş ABŞ-ın keçmiş prezidenti və biznesmen Donald Tramp və demokrat və yarışdan kənarlaşan dövlət başçısı Co Baydeni əvəz etmiş hazırkı vitse-prezident Kamala Harris mübarizə aparırdı.
İlkin məlumatlara görə, Respublikaçı Donald Tramp 279, Kamala Harris isə 223 nümayəndə qazanıb.
"Truth Social" 2022-ci ilin fevralında istifadəyə verilib. Ana şirkəti olan "Trump Media & Technology Group"un səhmləri NASDAQ birjasında ticarət olunur.
İyulun ortalarında kampaniyası zamanı mitinqində Trampa sui-qəsd cəhdindən sonra "Trump Media & Technology Group"un səhmləri kəskin şəkildə bahalaşmışdı. Sonra, Kamala Harisin seçiləcəyi ehtimalının artması ilə, Sentyabr ayının sonlarında, "Trump Media & Technology"nin səhmlərinin qiyməti bir səhm üçün 12 dollardan aşağı düşmüşdü.
"Trump Media & Technology şirkətinin əksəriyyəti ABŞ-ın keçmiş prezidenti Donald Trampa məxsusdur. Birjada siyahıya daxil ediləndən bəri "Trump Media" səhmləri, şirkətə Trampın ABŞ seçkilərində qalib gəlməsinə spekulyativ mərc kimi baxan treyderlər arasında məşhur olub", - Reuters yazıb. Tramp şirkətin 57%-nə sahibdir.
Donald Trump-ın media şirkəti, qısamüddətli investisiyalar da daxil olmaqla, 1 milyon dollarlıq gəlir əldə etdiyini bildirib. "Trump Media & Technology" həmçinin tədqiqat və inkişaf xərclərinin 3,9 milyon dollar olduğunu açıqlayıb.
“Trump Media & Technology Group”un səhmləri son bir ay ərzində 105,7% dəyər qazanıb, lakin bu cür dinamika şirkətin fundamental cəlbediciliyini əks etdirmir, əslində qiymət artımına Donald Trampın Ağ Evə qayıtması ilə bağlı gözləntilər təkan verib.
Mənfəət çatışmazlığından əlavə, şirkətin istifadəçi bazasını genişləndirməkdə problemləri var - "Trump Media & Technology Group" istifadəçilərin sayı barədə məlumat dərc etmir, lakin bəzi hesablamalara görə, "Truth Social"ın auditoriyası gündəlik 1 milyon aktiv istifadəçini keçməyib. Trampın qələbəsi potensial olaraq istifadəçiləri platformaya cəlb edəcək, lakin şirkətin uzunmüddətli perspektivləri haqqında danışmaq çətindir.
