İspaniyanın Alxesiras limanında polis və gömrük xidməti tərəfindən Ekvadordan gətirilən banan konteynerlərində 13 ton kokain aşkar edilərək müsadirə edilib.
İqtisadiyyat.az xəbər verir ki, bu barədə "El Mundo" qəzeti yazıb.
Nəşrin yazdığına əsasən, bu, İspaniyada 2023-cü ilin yayından sonra aşkar edilən ən böyük kokain partiyasıdır. Həmin yayda limanda 9,5 ton kokain ələ keçirilmişdi.
Araşdırmalara əsasən, narkotik yükləri Alicante vilayətində yerləşən bir şirkət üçün nəzərdə tutulub. Bu çərçivədə Toledo şəhərində bir şübhəli də polis tərəfindən saxlanılıb.
Xatırladaq ki, İspaniya hüquq-mühafizə orqanları bu yaxınlarda Barselona limanında dörd tondan çox kokain müsadirə etmişdi. O zaman narkotiklər Paraqvaydan gətirilən düyü konteynerlərində tapılmışdı.
