“Real”ın direktoru Emilio Butragenyo “qaymaqlılar”ın fransalı ulduz hücumçusu Kilian Mbappenin aşağı məhsuldarlığına aydınlıq gətirib.
Arena.az AS dərgisinə istinadən, ispan mütəxəssisin bu barədə fikrini təqdim edir:
“Mbappenin hər oyunda aşkar qol fürsətləri var. Hücumçunun fürsətlərinin olması yaxşı əlamətdir, amma Kilian hələ bütün bu fürsətləri gerçəkləşdirmək üçün hücumçulara gərək olan qədər imkana sahib deyil. Mbappe “Barselona”ya da qol vura bilərdi… Amma bəzən belə hallar yaranır. Mbappe dünya səviyyəli oyunçudur və o, tezliklə yenidən qol vurmağa başlayacaq”, deyə Butragenyo bildirib.
Bu arada, “Give me Sport” dərgisi “qaymaqlılar”ın italyan baş məşqçisi Karlo Ançelottinin Kilian Mbappenin oyunundan narazı olduğu haqda məlumat sızıntısını ictimailəşdirib.
Mənbənin məlumatına görə, italyan mütəxəssis bu mövsüm müxtəlif oyunlarda Mbappedən daha çox tələbdədir. Ançelotti Mbappenin qol ayağının açılacağına ümid bəsləyib səbr etsə də, ulduz futbolçunun komandanın müdafiə fəaliyyətində iştirak etməməsindən məyusdur.
Fransalı hücumçunun topa sahib olmadığı vaxtlarda komanda yoldaşlarına kömək edə bilməməsi, daha doğrusu “canını işə vermək istəməməsi”, “Barselona” ilə oyunda (0:4) Ançelottiyə xüsusilə nəzərə çarpıb. O vaxtdan bəri Ançelotti Mbappeni “Real”ın ən böyük fəsadı adlandırıb. Vurğulanır ki, italyan mütəxəssis bütün bu halların Kilian Mbappenin “Real”a gəlişi ilə gətirdiyi fəsadlar olduğu və bunların komandanın tarazlığını pozduğu qənaətindədir.
Benzemadan Mbappeyə “qardaşyana” məsləhət
“Real”ın fransalı keçmiş hücumçusu Kərim Benzema isə Kilian Mbappeyə “qardaşyana” məsləhət verib:
“Kilian üçün məsləhətim varmı? Təslim olma. O, “doqquzluq” olaraq oynamaq məcburiyyətində qalacağını beyninə daxil etməlidir. O, çox dəyişməlidirlər. Kilian sol cinahda çox yaxşıdır, amma indi o, başqa mövqedə çox yaxşı olmalıdır”.
Xatırladaq ki, Kilian Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib. 2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-nin düşərgəsinə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Kilian Mbappe 2024-cü ilin iyul ayında PSJ-dən azad agent qismində ayrılaraq, İspaniya nəhəngi “Real”ın düşərgəsinə keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində bütün yarışlarda 15 oyuna çıxıb, 8 qol vurub, 2 məhsuldar ötürmə verib.
Klub səviyyəsində Mbappe PSJ ilə 7 dəfə Fransa Liqa 1-in, 3 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun qalibi olub.
Kilian Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
“Transfermarkt” internet-portalı 25 yaşlı fransalı mərkəz hücumçusunun transfer dəyərini 180 milyon avro məbləğində qiymətləndirir.
