Fins.az - Almaniya kansleri Olaf Şolts 6 noyabr tarixində ölkənin maliyyə naziri Kristian Lindneri istefaya göndərib.
Bild nəşrinin məlumatına əsasən, koalisiya komitəsinin axşam keçirilən iclasında Lindnerin iqtisadi böhrandan çıxmaq üçün erkən seçkilərə getmək təklifi Kansler tərəfindən rədd edilib. Şoltsun bu addımı ölkədə siyasi qeyri-sabitliyə səbəb olub və hakim koalisiyanın dağılma ehtimalını gücləndirib.
Son vaxtlar Almaniyada əhalinin iqtisadi böhranla bağlı narahatlığı artıb. Ölkənin iqtisadiyyatına ciddi təsir göstərən dörd əsas problemin yaxınlaşdığı bildirilir. Mütəxəssislər inflyasiya, yüksək enerji qiymətləri, sənaye sektorunda tənəzzül və xarici ticarət balansının pozulmasının Almaniya iqtisadiyyatı üçün ciddi təhlükələr yaratdığını qeyd edirlər.
Bu addım Almaniyada həm daxili siyasət, həm də iqtisadi vəziyyət üçün mühüm dönüş nöqtəsi ola bilər. Kanslerin maliyyə naziri ilə razılaşmazlığı və koalisiya daxilində yaranan fikir ayrılıqları, ölkənin gələcək iqtisadi və siyasi kursuna təsir edəcək. Analitiklər yaxın günlərdə baş verəcək siyasi dəyişikliklərin ölkə iqtisadiyyatının bərpası və stabilliyə qovuşması üçün vacib olduğunu bildirirlər.
