“Arsenal” və “Barselona”nın fransalı keçmiş futbolçusu Tyeri Anri “Real”ın ulduz hücumçusu Kilian Mbappenin oyununu tənqid edib.
Arena.az xəbər verir ki, fransalı veteran forvard həmyerlisinə “qaymaqlılar”ın ingilis yarımmüdafiəçisi Cud Bellingemi misal çəkib:
“Düşünürəm ki, komanda Mbappedən məyus olub və mən başa düşürəm ki, bu, asan deyil… Cud Bellingem “9” nömrəli Mbappenin etməli olduğunu icra etməyə çalışır… O, təkmilləşəcək, çünki bundan daha da pis olmağın yeri yoxdur. Biz ondan Didye Droqba kimi topu saxlamasını tələb etmirik, topu götürüb hamını sarıyıb keçməsini istəmirik, amma komanda zərbədə olanda özünü göstərməsini istəyirik”, deyə Anri bildirib.
Xatırladaq ki, Kilian Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib. 2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-nin düşərgəsinə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Kilian Mbappe 2024-cü ilin iyul ayında PSJ-dən azad agent qismində ayrılaraq, İspaniya nəhəngi “Real”ın düşərgəsinə keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində bütün yarışlarda 15 oyuna çıxıb, 8 qol vurub, 2 məhsuldar ötürmə verib.
Klub səviyyəsində Mbappe PSJ ilə 7 dəfə Fransa Liqa 1-in, 3 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun qalibi olub.
Kilian Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
