Rusiya prezidenti Vladimir Putin ABŞ-ın 47-ci prezidenti seçilən Donald Trampı təbrik edib və onunla danışmağa hazır olduğunu bildirib.
MArja xəbər verir ki, Putin Rusiyanın Soçi şəhərində keçirilən Beynəlxalq Valday Diskussiya Klubunun iclasında çıxış edib.
Trampın ona qarşı sui-qəsd cəhdi zamanı davranışından təsirləndiyini bildirən Putin, "Bu məni heyran etdi. O, cəsur bir insan çıxdı" deyib.
Putin, "Rusiya ilə münasibətləri bərpa etmək, Ukrayna böhranının sona çatmasına töhfə vermək istəyi ilə bağlı bəzi şeylər Tramp tərəfindən ifadə olunub. Düşünürəm ki, ən azı bu barədə düşünməyə dəyər", - əlavə edib.
Putin daha əvvəl Rusiyanın ABŞ xalqı tərəfindən seçilən dövlət başçısı ilə işləyəcəyini qeyd etdiyini bildirib və əlavə edib: "Həqiqətən də belə olacaq. Fürsətdən istifadə edərək onu təbrik etmək istərdim. Kimsə əlaqəni davam etdirmək istəyirsə, biz bunun əleyhinə deyilik”.
Putin, "Trampla danışmağa hazırsınızmı?" sualına “hazıram, hazıram” deyərək cavab verib.
