“Qarabağ”ın futbolçuları – yarımmüdafiəçilər Marko Yankoviç, Yassin Benzya və Patrik Andrade ölkələrinin milli komandalarına dəvət alıblar.
Arena.az xəbər verir ki, Yankoviç Monteneqro millisinə, Benzya Əlcəzair yığmasına, Andrade isə Kabo Verde milli komandasına dəvət alıb.
Patrik Kabo Verde yığmasının Afrika Millətlər Kubokunda Misir və Mavritaniyaya qarşı keçirəcəyi oyunlarda iştirak etmək şansı qazanıb. Patrikin komandası noyabrın 15-də Misir yığmasını qəbul edəcək, ayın 19-da isə Mavritaniya ilə səfər oyunu baş tutacaq.
Patrik Andrade 2023-cü ilin iyul ayından “Qarabağ”ın formasını geyinir. O, 2020-ci ilin avqustundan 2022-ci ilin yayına qədər də “Qarabağ”da çıxış edib. Patrik “Qarabağ”da bütövlükdə 126 oyuna çıxıb, 15 qol vurub, 16 məhsuldar ötürmə verib. Andrade 2020-ci ilin oktyabr ayında debüt etdiyi Kabo Verde yığmasının heyətində 27 oyuna çıxıb, fərqlənə bilməyib.
Yassin Benzyanı isə Əlcəzair yığmasının heyətində Afrika Millətlər Kubokunda Ekvatorial Qvineya və Liberiya yığmaları ilə oyunlar gözləyir. Əlcəzair yığması noyabrın 14-də Ekvatorial Qvineyanın qonağı olacaq, ayın 17-də isə Liberiya millisini qəbul edəcək.
Yassin Benzya 2023-cü ilin yanvar ayından “Qarabağ”da forma geyinir. Hücumameyilli yarımmüdafiəçi indiyə qədər Ağdam klubunun heyətində 73 oyuna çıxıb, 21 qol vurub, 20 məhsuldar ötürmə müəllifi olub. Yassinin Azərbaycan çempionu ilə 2025-ci ilin 30 iyununa kimi müqaviləsi var. O, 2016-cı ilin mart ayında debüt etdiyi Əlcəzair yığmasının heyətində 11 oyuna çıxıb, 4 qol və 1 assistlə fərqlənib.
Marko Yankoviçli Monteneqro yığması isə UEFA Millətlər Liqası çərçivəsində İslandiya və Türkiyə milliləri ilə üz-üzə gələcək. Yankoviçin komandası hər iki oyunu doğma meydanda keçirəcək. İslandiya ilə görüş noyabrın 16-da, Türkiyə ilə görüş isə ayın 19-da baş tutacaq.
Marko Yankoviç 2022-ci ilin iyul ayından “Qarabağ”ın uğurları üçün çalışır. 28 yaşlı mərkəz yarımmüdafiəçisi Ağdam klubunda 103 oyun keçirib, 7 qol və 13 məhsuldar ötürmə müəllifi olub. O, 2016-cı ilin may ayında debüt etdiyi Monteneqro yığmasında 50 oyuna çıxıb, 1 qol və 6 məhsuldar ötürmə müəllifi olub.
