Vətən Müharibəsi şəhidi Vüsal Rüstəmovun anım günü qeyd olundu

Şəhidimizin ailə üzvləri, Azərbaycan Qarabağ Müharibəsi Əlilləri, Veteranları və Şəhid Ailələri İctimai Birliyi (AZQMƏVŞAİB) Cəbrayıl rayon filialının sədri Səbuhi Hüseynov, filialın üzvləri, deputatın köməkçisi Rəşad Quluyev, Cəbrayıl Rayon İcra Hakimiyyətinin nümayəndəsi Abbas Abbaslı şəhidin məzarı önündə toplaşaraq onu ehtiramla anıblar.

Anım tədbiri şəhidimizin Sulutəpə qəsəbəsində yerləşən məzarını ziyarət etməklə başlayıb. Ziyarətçilər Vüsal Rüstəmovun məzarı önündə dualar oxuyaraq, onun ruhuna ehtiramlarını ifadə ediblər. Vüsal Rüstəmovun Vətən uğrunda canından keçən qəhrəmanlarımız sırasında olması, onun xatirəsinin daima xalqın qəlbində yaşayacağını bir daha vurğuladı.

Tədbirdə çıxış edənlər Vətən şəhidlərinin xalqımız üçün qürur mənbəyi olduğunu və onların hər birinin Vətən torpaqlarının müdafiəsi uğrunda göstərdiyi qəhrəmanlığın unudulmaz olduğunu qeyd ediblər. Şəhidlərimizin müqəddəs ruhlarının daim xalqımızın dualarında yaşadığı, onların fədakarlığı və canı bahasına Vətən torpağının düşmən işğalından azad edildiyi vurğulanıb.

Allah bütün şəhidlərimizə rəhmət eləsin, ruhları şad olsun! Şəhidlərimiz xalqımızın qəlbində əbədi olaraq yaşayacaq və onların xatirəsi gələcək nəsillərə örnək olacaqdır.