Noyabrın 9-dan 10-na keçən gecə səmada parlayan alov topu ABŞ-ın cənub-şərqində yaşayan sakinləri qorxudub.
BAKU.WS xarici KİV-ə istinadən xəbər verir ki, hadisə SpaceX-in Starlink peykinin Yer atmosferinə daxil olduqdan sonra alışması nəticəsində baş verib.
Söhbət Starlink-4682 cihazından gedir. O, 2022-ci ilin avqustunda kosmosa göndərilib – peyk iki il orbitdə olub.
Astrofizik Conatan Makdauellin sözlərinə görə, o, Yer atmosferinə daxil olub və Aydaho, Vayominq, Kolorado və Oklahoma ştatlarının üzərindən uçaraq nəhayət Texas səmasında çöküb.
Xatırladaq ki, oxşar hadisə sonuncu dəfə avqust ayında Avropada baş vermişdi. Fransa Astronomiya Cəmiyyətinin vitse-prezidenti Gilles Davidoviçin dediyinə görə, peyk atmosferə daxil olub və alovlanıb, bunu Fransa, Almaniya və İsveçrənin bir sıra regionlarının sakinləri müşahidə ediblər.
