“Mançester Siti”nin mərkəz müdafiəçisi Ruben Dias “şəhərlilər”in ardıcıl 4 məğlubiyyətindən sonra azarkeşlərə səslənib:
Arena.az portuqal futbolçunun bu barədə fikrini təqdim edir:
“Lütfən, bizə şübhə etməyin. Keçən mövsüm də bu dövrlərdə, Miladdan əvvəl çətin bir kəsim yaşamışdıq. Treblə imza atdığımız mövsümdə hətta uğursuz dövrü “qara yanvar” adlandırmışdıq. Ən vacib olan bu vəziyyətlərdən necə çıxdığınızdır. Məhz buna görə komandaya inanmaq lazımdır. Belə çətin dövrdə bir olmalı və xarakter nümayiş etdirməliyik. Yenidən bacaracağımıza inanırıq”.
Xatırladaq ki, son illərin dəyişməz çempionu “mançester Siti” cari mövsümdə uğursuz çıxışı ilə diqqət mərkəzindədir. Belə ki, Xosep Qvardiolanın çalışdırdığı “Mançester Siti” 3 müxtəlif yarış çərçivəsində keçirdiyi son 4 oyunda ardıcıl məğlubiyyətlər alıb. İngiltərə Liqa Kubokunda “Tottenhem” (1:2), İngiltərə Premyer Liqasında “Bornmut” (1:2) və “Brayton” (1:2) və Çempionlar Liqasında Lissabon “Sportinq”i (1:4) “şəhərlilər”i peşman ediblər.
Bu nəticələrdən sonra “Mançester Siti” klub səviyyəsində 18 il öncəki antirekordunu təkrarlamış olub. “Şəhərlilər” 2006-cı ildən bəri ilk dəfə olaraq, ardıcıl 4 oyunda məğlubiyyət yaşayıblar.
11 turdan sonra 23 xal toplamış “Mançester Siti” İngiltərə Premyer Liqasının yarış cədvəlində 2-ci pillədə qərarlaşıb. İndi şəhərlilər 28 xalla yarış cədvəlinə başçılıq edən “Liverpul”dan 5 xal geri qalırlar.
Ruben Dias 2020-ci ilin sentyabrından “Mançester Siti”də çıxış edir. 27 yaşlı futbolçu “şəhərlilər”in heyətində cari mövsümdə 14 oyuna çıxıb, məhsuldarlıq nümayiş etdirə bilməyib. Onun “Mançester Siti”nin heyətindəki çıxışı rəqəmlərin gözü ilə belədir: 192 oyun, 4 qol, 5 assist. Müdafiəçinin “şəhərlilər”lə müddəti 2027-ci ilin yayına qədər olan sözləşməsi var.
Portuqaliyanın “Benfika” klubunun yetirməsi olan futbolçu, ölkəsinin milli komandasında da forma geyinir. O, Portuqaliya yığmasında meydana çıxdığı 64 matçda 3 qol da vurub. Dias “Benfika” və “Mançester Siti” ilə çoxsaylı titullara sahib çıxıb, Portuqaliya yığması ilə də UEFA Millətlər Liqasının qalibi olub.
“Transfermarkt” internet-portalı 27 yaşlı müdafiəçinin transfer dəyərini 80 milyon avro məbləğində qiymətləndirir.
