Bu gün Bakıda COP29 çərçivəsində “Enerji keçidinin maliyyələşdirilməsində suveren rifah fondlarının rolu” mövzusunda panel müzakirə keçirilib.
APA xəbər verir ki, tədbir COP29 sədrliyi, Azərbaycan Respublikası Dövlət Neft Fondunun birgə təşkilatçılığı ilə baş tutub.
"Itmar Capital" şirkətinin Baş İcraçı Direktoru Obaid Amrane çıxışı zamanı enerji keçidinin vacibliyini vurğulayıb:
"Azərbaycan hakimiyyətinə belə mühüm beynəlxalq toplantıya, COP29-a ev sahibliyi və tədbirin nümunəvi təşkilinə görə, təşəkkür edirəm. Bu cür tədbirlər və sessiyalar Azərbaycanın bu çətin, lakin maraqlı enerji keçidi səyahətində, həm uzunmüddətli baxış, həm də fəaliyyət tələb edən yolda necə öndə getdiyini göstərir. İqlim dəyişikliyi ilə mübarizə, həmişəkindən daha vacibdir. Buna görə də problemlərin miqyasına və mürəkkəbliyinə cavab vermək üçün iqlim maliyyəsi əldə olunmalıdır. Enerji keçidi görünməmiş qlobal koordinasiya və kapital tələb edir. İnkişaf etməkdə olan iqtisadiyyatların böyük ehtiyaclarına əlavə olaraq, onlara lazımi miqyasda və sürətlə enerji keçidinə sərmayə qoymağa mane olan struktur zəiflikləri var".
Azərbaycan Respublikası Dövlət Neft Fondunun (ARDNF) İcraçı direktoru İsrafil Məmmədov deyib ki, bu gün diqqətimizi dövrümüzün ən aktual çağırışlarından və imkanlarından birinə, enerji keçidinə yönəldirik. O bildirib ki, enerji mənzərəsi dəyişir və biz də dəyişməliyik:
"Qlobal prioritetlər karbonsuzlaşmaya doğru dəyişdikcə, biz həm problem, həm də fürsətlə qarşılaşırıq. Enerji keçidini nəzərdən keçirərkən onun mürəkkəbliyini dərk etmək çox vacibdir. Onun qəlbində mən adlandırdığım şey yatır - enerjiyə keçid prioriteti, enerji təhlükəsizliyinin təmin edilməsi zərurəti, əlverişlilik və davamlılıq".
