Almaniya hökuməti Rusiya mənşəli mayeləşdirilmiş təbii qaz ("LNG") yüklərinin qəbul olunmaması üçün dövlətə məxsus qaz idxalı terminallarına xəbərdarlıq edib.
Valyuta.az "Financial Times"a istinadən xəbər verir ki, 6 noyabr tarixli məktubda Almaniya İqtisadiyyat Nazirliyi "Deutsche Energy Terminal" şirkətinə Brunsbyüttel şəhərində yerləşən idxal terminalının bazar günü Rusiyadan qaz yükü alacağını bildirdikdən sonra, "heç bir Rusiya LNG təchizatını qəbul etməməsi" üçün təlimat verib.
Nazirlik bu əmrini ölkənin "prioritet ictimai maraqlarını" qorumaq məqsədi ilə verdiyini açıqlayıb və operatora "növbəti xəbərdarlığa qədər Rusiyadan LNG təchizatlarını rədd etməsi" təlimatını verib. Bu təchizat cəhdi, mayeləşdirilmiş təbii qazın Avropa İttifaqı və ABŞ-ın sabiq prezidenti Donald Trampın dövründə bir diplomatik təsir aləti olaraq nəzərdən keçirildiyi bir zamanda baş verir. Avropa Komissiyasının prezidenti Ursula fon der Lyayen ötən həftə Rusiya mənşəli "LNG"ni ABŞ-dan daha çox qaz alışı ilə əvəzləmə ideyasını irəli sürüb.
Qeyd edək ki, Vladimir Putin 2022-ci ildə Ukraynaya genişmiqyaslı hücuma başlamazdan əvvəl Almaniya Avropada ən böyük Rusiya qazı idxalçısı idi. Putinin Almaniya və digər Avropa ölkələrinə boru xətti ilə göndərilən qazı kəsməsindən sonra kansler Olaf Şoltsun hökuməti alternativ mənbələr axtarışına çıxaraq dəniz yolu ilə qaz idxalı üçün bir sıra "LNG" terminalları inşa edib.
Almaniya İqtisadiyyat Nazirliyinin məktubunda qeyd edilib ki, bu təchizatın qəbul edilməsinə icazə verilməsi halında, "LNG" terminalının yaradılmasının əsas səbəbi olan Almaniya və Avropa İttifaqını "Rusiya qazının asılılığından çıxarma" məqsədinə zidd olardı.
Lakin ABŞ və Böyük Britaniya Rusiyadan "LNG" idxalını qadağan etsə də, Aİ bu yanacağı idxal etməyə davam edir. "Kpler" şirkətinin məlumatına əsasən, Aİ-nin "LNG" təchizatının 20 faizi Rusiyadan gəlir. Rusiya mənşəli "LNG"nin çox hissəsi uzunmüddətli müqavilələr əsasında Fransa, İspaniya və Belçikaya göndərilir və aidiyyəti şirkətlər tam qadağa olmadığı halda müqavilələrdən çıxa bilməyəcəklərini bildirirlər. Məktubda Almaniyanın Rusiyanın işğalından bəri birbaşa Rusiya "LNG"si idxal etmədiyi və nazirlikdən gələn təlimatın "bu vəziyyətin dəyişməməsini təmin etdiyi" vurğulanır.
Rəhim
