“Liverpul”un misirli ulduzu, cinah hücumçusu Məhəmməd Salah cari mövsüm üçün şəxsi iddiaları ilə bağlı sualı cavablayıb.
Arena.az İngiltərə klubunun rəsmi “YouTube” kanalında yayımlanmış video əsasən, misirli ulduzun bu barədə fikrini təqdim edir:
“Hər şeyi qazanmaq. Mən hər gün çox o qədər çox işləyirəm ki, ona görə də kiminsə bizim zəif olduğumuzu düşünməsi fikri məndə nifrət doğurur. Xeyr, bizim inanılmaz komandamız var – dünyanın ən yaxşılarından biriyik. Heyətimizdə hər mövqedə dünyanın ilk üçlüyünə düşən oyunçulara rast gəlmək olar. Bu şəhər və bu klub həmişə hər şey üçün mübarizə aparmalıdır”, deyə Salah vurğulayıb.
Məhəmməd Salah 2017-ci ilin iyulundan “Liverpul”da çıxış edir. İngiltərə nəhəngi həmin vaxt Salahın “Roma”dan transferi müqabilində 42 milyon avro məbləğində xərc çəkmişdi. Misirli ulduzun “qırımızlar”la müqaviləsi 2025-ci ilin iyun ayının sonuna qədər qüvvədədir.
Salah cari mövsümdə “qırmızılar”ın heyətində bütün yarışlarda 17 oyuna 10 qol vurub, 10 məhsuldar ötürmə verib. Misirli hücumçunun “Liverpul”un heyətində ümumi statistikası isə belədir: 366 oyun, 221 qol, 99 məhsuldar ötürmə.
Misirli ulduz hücumçu “Liverpul”la bütün mümkün ali klub yarışlarının qalibi olub.
Salah “Liverpul” və “Roma”dan başqa, “Fiorentina”, “Çelsi”, “Bazel” və “Əl-Mukavilun” klublarında çıxış edib.
Məhəmməd Salah hazırda kapitanı olduğu, 2011-ci ilin sentyabr ayında debüt etdiyi Misir yığmasının heyətində 101 oyun keçirib, 58 qol vurub, 33 məhsuldar ötürmə verib.
“Transfermarkt” internet-portalı 32 yaşlı misirli cinah hücumçusunun transfer dəyərini 55 milyon avro məbləğində qiymətləndirir.
