“İkinci əl” malların satıldığı “sekund-hənd” mağazalarından alınan paltarlar qızıl stafilokok, salmonella, bağrsaq çöpü, norovirus və rotavirus kimi bir çox yoluxucu patogenləri saxlaya bilər.
Azpost.info bildirir ki, bu barədə Leicester Universitetinin klinik mikrobiologiya üzrə baş müəllimi Primrouz Fristoun “The Conversation” nəşrinə bildirib.
Alimin sözlərinə görə, insanlar getdikcə planetin resurslarına qənaət etmək üçün “ikinci əl” paltar almağı düşünürlər. Bununla belə, bu cür məhsullar bir çox patogen mikrobların daşıyıcısına çevrilə bilər. Çünki bu mikroblar düzgün təmizlənməsə parça üzərində qalır.
Alim qeyd edib ki, geyimdə müxtəlif yoluxucu patogenlər, o cümlədən bakteriyalar (qızıl stafilokok, salmonella və bağırsaq çöpü) və mikoz və göbələklər yaşaya bilər. Fristoun qeyd edib ki, Pakistanda bir bazarda satılan ikinci əl paltarların mikrobioma tədqiqatı dəri və qan infeksiyalarına səbəb ola bilən Bacillus subtilis və qızıl stafilokok olduğunu təsdiqləyib. Dermatit və ya qaşınma kimi dəri xəstəliklərinə səbəb ola bilən parazitlər də aşkar edilib.
Mütəxəssis izah edib ki, insan dərisində mövcud olan mikroblar tər, piy, dəri hüceyrə zülallarında olan amin turşuları ilə qidalanaraq paltarda yaşaya bilir. Bu vəziyyətdə, patogen mikroorqanizmlər sahibinin dəyişdirilməsindən sonra bir neçə aya qədər parça üzərində qala bilər. Mikroblar polyester materiallarda, xüsusən də yüksək rütubət şəraitində 200 günə qədər yaşaya bilir.
Mikroblarla əlaqəli riskləri minimuma endirmək üçün istifadə edilmiş paltarları düzgün təmizləmək vacibdir. Təxminən 60 ° C temperaturda yuyucu vasitə ilə yuyulması tövsiyə olunur. Bu, yalnız kirləri təmizləməyə deyil, həm də patogen mikroorqanizmləri məhv etməyə kömək edəcək.
Mütəxəssislər, həmçinin çarpaz çirklənmənin qarşısını almaq üçün işlənmiş paltarları adi paltarlardan ayrı yumağı məsləhət görürlər. Bütün mikrobların məhv olmasını təmin etmək üçün məhsullar bir neçə saat ərzində antibakterial toz ilə məhlulda saxlanıla bilər.
Azpost.info
