Fransa yığmasının baş məşqçisi Didye Deşam “Real”ın fransalı ulduz hücumçusu Kilian Mbappenin fəsadlarından söhbət açıb.
Arena.az fransız mütəxəssisin bu barədə fikrini təqdim edir:
“Ortada heç bir cəza yoxdur. Bu, bir faktdır. O, çətin bir vəziyyətdədir, mən isə onu dəstəkləyirəm. O, karyerasının heç də ən xoşbəxt dövrünü yaşamır. O, hər şeyə rəğmən, yığmaya gəlmək istəyirdi. Məncə, indi onun üçün daha yaxşıdır. Hər kəs çətin bir dövrdən keçə bilər. Bunun həm fiziki, həm də psixoloji tərəfi var. Həmişə nəsə deyib-demədiyim barədə qondarma şərhlər dolaşır. Ona görə də sözlərimi diqqətlə seçməyə çalışıram. Ya bir xüsusu deyirəm, ya da demirəm. Mən susmadım, amma müzakirələrə qarışmayacağam”.
Xatırladaq ki, Didye Deşam Kilian Mbappeni “xoruzlar”ın İsrail və İtaliya yığmaları ilə UEFA Millətlər Liqası oyunlarına çağırmamaq qərarına gəlib. Göründüyü kimi, Deşam qərarının sırf idmani səbəblərdən qaynaqlandığını bir daha təsdiqləyib. Buna rəğmən, fransız mütəxəssisin müvafiq qərarnın şəxsi-qərəzliyə dayandığına dair şayiələrin ardı-arası kəsilmir.
Kilian Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illər aralığında Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq, İspaniya nəhəngi “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində bütün yarışlarda 16 oyuna çıxıb, 8 qol vurub, 2 məhsuldar ötürmə verib.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
