İran prezidenti Məsud Pezeşkian COP29 sammitində iştirak edəcəyini bildirsə də Bakıya gəlmədi. İran prezidentinin Bakıda keçirilən COP29-da iştirak etməməsinin səbəbi açıqlanıb. Hökumət sözçüsü Fatimə Mühacirani İsrail nümayəndə heyətinin Bakıda keçirilən COP29 toplantısında iştirakı səbəbindən İran prezidenti Məsud Pezeşkianın Bakıya gəlmədiyini bildirib:
“Ölkələr öz maraqlarına uyğun olaraq sammitlərdə iştirak edirlər. Rəsmilərinin bu sammitlərdə iştirak səviyyəsi sammitin səviyyəsinə və əhəmiyyətinə və digər ölkələrin iştirak səviyyəsinə uyğun seçilir. Bakıda keçirilən sammitə isə vitse-prezident və Ətraf Mühit Təşkilatının rəhbəri Şina Ənsari qatılıb”.
Bu barədə Moderator.az-a açıqlama verən siyasi şərhçi Tural İsmayılov qeyd edib ki, COP29 tədbirində dünyanın önəmli ölkələrinin prezidentləri və baş nazirləri iştirak edir:
“Tədbirdə dünya səviyyəli qonaqların iştirakı bir daha onu söyləməyə əsas verir ki, COP29-a maraq böyükdür. Tədbirdə dünyanın aparıcı ölkələri beynəlxalq iqlim təhlükəsizliyi və ətraf mühitlə bağlı öz məsuliyyətlərini nümayiş etdirməyə çalışırlar. Həmin ölkələr COP29 tədbirlərində çox aktiv şəkildə iştirak edirlər. Təəssüf ki, dünyanın bir çox ölkə prezidentlərinin qatıldığı tədbirdə İran prezidenti iştirak etmədi. Halbuki Məsud Pezeşkian yeni prezident seçiləndə ətraf mühitlə, iqlim təhlükəsizliyi ilə bağlı müəyyən vədlər vermişdi. Hətta Pezeşkian İranın qonşu ölkələrlə münasibətlərinin normallaşması ilə bağlı açıqlamalar vermişdi. Buna baxmayaraq, Azərbaycanda keçirilən COP29 tədbirində İranın vitse prezidenti işirak etdi. Əlbəttə ki, İranın qərar verməkdə müstəqildir. Əgər Azərbaycanla İran arasında müsbət əlaqələr haqqında danışılırsa, o zaman İran prezidentinin COP29-da işirakı daha məqbul olardı.
Eyni zamanda, Fransa və Ermənistanın COP29- da iştirak etməməsi onu göstərir ki, iki ölkə beynəlxalq iqlim məsələləri və digər mövzularda tamamilə saxtakar ölkələrdir və onlar bütün məsələlərə özlərinin dar ideoloji baxışları ilə yanaşırlar”.
Mehin Mehmanqızı
