Bu həftə dəm qazından vəfat edən tələbələr Balabacı Manafova və Nərmin Hüseynova eyni rayonun sakinləri olublar.
Modern.az-ın məlumatına görə, Balabacı Manafova Azərbaycan Dövlət Iqtisad Universitetinin Zaqatala filialının Turizm işinin təşkili ixtisası üzrə 5-ci kurs tələbəsi olub.
Xaçmaz rayonunun Çinartala kəndindən olan tələbə bir ay öncə ailə həyatı qurub. 1999-cu il təvəllüdlü Balabacı Manafova noyabrın 13-də ailəsi ilə birlikdə kirayədə yaşadığı mənzildə dəm qazından zəhərlənib.
Onun həyatını xilas etmək mümkün olmayıb.
Noyabrın 15-də isə Azərbaycan Tibb Universitetinin (ATU) Stomatologiya fakültəsinin III kurs tələbəsi Nərmin Hüseynova Kamal qızı vəfat edib.
O, Bakıda yaşadığı mənzildə dəm qazından boğularaq həyatını itirib.
Tələbə Xaçmaz şəhər 8 N-li məktəb-liseyi fərqlənmə ilə bitirib, 2022-ci ildə 597 balla Azərbaycan Tibb Universitetinin Stomatologiya ixtisasına dövlət sifarişi əsasında qəbul olunub.
Hər iki faktla bağlı araşdırma aparılır.
