Dünyanın aparıcı avtomobil istehsalçılarından biri olan General Motors (GM) qlobal avtomobil bazarında rəqabət qabiliyyətini artırmaq və xərcləri azaltmaq üçün dünya üzrə təxminən 1000 əməkdaşını ixtisar edir.
Marja.az-ın məlumatına görə, Şirkətin açıqlamasında bildirilir ki, ixtisarlar əsasən "ağ yaxalıqlı" işçiləri (şirkətdə inzibati işlərə və əməliyyatlara cavabdeh olan menecerləri) əhatə edəcək.
Qərardan təsirlənən işçilərə ötən cümə günü məlumat verilib. GM press-relizində ixtisarları təsdiqləsə də, proses haqqında ətraflı məlumat paylaşmayıb. "Biz sürət və mükəmməllik üçün optimallaşdırma aparmalıyıq. Buraya səmərəli işləmək, düzgün komanda strukturuna sahib olmaq və diqqəti əsas prioritetlərimizə yönəltmək daxildir", - açıqlamada deyilir.
Elektrikli nəqliyyat vasitələrinin transformasiyasında qeyri-müəyyənlik
GM və digər böyük avtomobil istehsalçıları ABŞ-da və bütün dünyada elektrikli nəqliyyat vasitələrinə (EV) keçiddə qeyri-müəyyənliklə üzləşirlər. Bu prosesdə şirkətlər kapital qoyuluşlarını hansı sahələrə yönəldəcəklərini və transformasiya tempini dəqiq müəyyən etməyə çalışırlar. GM elektrik avtomobillərinin akkumulyatorlarına və montaj obyektlərinə sərmayə qoyarkən, qazla işləyən modellərini inkişaf etdirməyə və bu modelləri yeni nəsil avtomobil texnologiyalarına uyğunlaşdırmağa davam edir.
Motorintelligence.com-un məlumatına görə, ABŞ-da elektrikli avtomobil satışları sentyabr ayında 7,2 faiz artaraq 936 min ədədə çatıb. Bu, əvvəlki ilin 47 faizlik artım tempi ilə müqayisədə yavaş artım deməkdir. Bununla belə, 2024-cü ildə elektrikli avtomobil satışlarının keçən ilki rekordu aşması və yeni avtomobil satışlarında EV-in payının 7,9 faizə yüksələcəyi gözlənilir.
2 milyard dollarlıq qənaət hədəfi
GM-in dünya üzrə təxminən 150 000 işçisi var. "Ağ axalıqlı"ların (şirkətin menecmenti) əksəriyyəti Miçiqan ştatının Uorren şəhərindəki texniki mərkəzdə çalışır. Məlumdur ki, ötən ilin sonunda şirkətin dünya üzrə 76 min "ağ yaxalı" işçisi var idi.
GM-in Baş Maliyyə Direktoru Paul Jacobson keçən ay bildirib ki, şirkət ilin sonuna qədər sabit xərclərə 2 milyard dollar qənaət etmək məqsədinə çatmaq yolundadır. Qənaət planının bir hissəsi olaraq, GM keçən aprel ayında təxminən 5 000 "ağ yaxalı" işçini könüllü olaraq işdən çıxarmağı təklif etmişdir.
