“Roma”nın ispan müdafiəçisi Mario Hermoso Madrid “Real”ının onun xidməti ilə maraqlanması haqda sualı cavablayıb.
Arena.az təcrübəli futbolçunun bu barədə cavabını təqdim edir:
“Bəli, bəli. Mən bu haqda oxumuşam. Bir çox dostlarım mənə məlumat göndərirdilər. Onların sizi böyük klublarla əlaqələndirməsi şərəfdir”, deyə Hermoso bildirib.
Madrid “Atletiko”sunun keçmiş müdafiəçisi İspaniya klubundan ayrılmasına da toxunub:
“Atletiko”dan ayrılmağımı izah etmək asandır: razılığa gələ bilmədik, ona görə də ayrı yollarımıza getməyə qərar verdik”, deyə ispan müdafiəçi Madrid klubundan ayrılığının əsl səbəbini açıqlayıb.
Xatırladaq ki, bu ilin yayında Madrid “Atletiko”sundan azad agent kimi ayrılmış ispaniyalı mərkəz müdafiəçisi Mario Hermoso sentyabr ayında “Roma”ya keçib. O, paytaxt klubu ilə 3 illik (2027-ci ilin 30 iyununadək) müqavilə bağlayıb. Mario “canavarlar”ın heyətində 9 oyuna çıxsa da, fərqlənə bilməyib.
Mario Hermoso Madrid “Real”ının yetirməsidir. Ölkəsində “Valyadolid” və “Espanyol”un da şərəfini qorumuş 29 yaşlı ispan müdafiəçi 2019-cu ildən “Atletiko”nun uğurları üçün çalışırdı. O, Madrid klubunun heyətində 174 oyuna çıxıb, 10 qol vurub, 6 məhsuldar ötürmə müəllifi olub.
Müdafiənin sol cinahında da oynamağı bacaran Hermoso, vaxtilə İspaniyanın U-19 yığmasında forma geyinib. 2018-ci ildə əsas millidə debüt matçına çıxmış Mario, İspaniya yığmasında cəmi 5 matça çıxıb. O, bu oyunlarda cəmi 1 məhsuldar ötürmə ilə yadda qalıb.
“Transfermarkt” internet-portalı 29 yaşlı müdafiəçinin transfer dəyərini 18 milyon avro məbləğində qiymətləndirir.
