Bəzi sürücülər ikinci dərəcəli yoldan baş yola daxil olan zaman harada dayanıb yol verməli olduqlarını hələ də bilmirlər. Elə hallar olur ki, sürücü üstünlüyə malik olan avtomobillərə yol vermək üçün yolayrıcına daxil olub dayanır. Bu zaman baş yoldakı avtomobilə yol vermək əvəzinə, əksinə təhlükə yaradır. Belə sürücülərdən biri Bərdə rayonunda (Diaqnostika mərkəzinin yaxınlığında) kameraya düşüb. Videodan da göründüyü kimi, sürücü yüksək sürətlə yolayrıcına daxil olaraq üstünlüyə malik olan avtomobilə qəza şəraiti yaradıb.
Belə vəziyyətdə həmin sürücü cərimələnə bilərmi?
Qeyd edək ki, ikinci dərəcəli yoldan baş yola daxil olan sürücü kəsişmə yerinin bilavasitə qarşısında dayanaraq baş yolla hərəkət edən sürücülərə yol verməlidir. Təqdim etdiyimiz videodakı sürücü kimi baş yola daxil olub dayanırsa, qayda pozmuş hesab edilir. Çünki yola daxil olub hərəkət zolağını zəbt edən sürücü baş yolla hərəkət edən sürücüyə birmənalı olaraq maneə yaratmış sayılır. Ona görə də belə hallarda sürücüyə yazılmış cərimə qanuni hesab edilir.
Bu qayda pozuntusuna görə, sürücü 3 bal 100 manat məbləğində cərimə oluna bilər.
Könül Rauf
