Mübariz İbrahimovun ev muzeyinə ziyarət edildi

Ziyarətdə İmişli şəhər Şəhid Namiq Şirinov adına 5 saylı Texniki Fənlər Təmayüllü Məktəb-Litseyi müəllim və şagird kollektivi iştirak edirdi.

Ziyarət zamanı iştirakçılar, Qəhrəmanımızın anası Şamama xanımla görüşərək, atasının – Ağakərim kişinin vəfatı ilə bağlı başsağlığı verdilər. Eyni zamanda, Mübariz İbrahimovun həyatı və qəhrəmanlığı ilə bağlı eksponatlar nümayiş olunan ev muzeyinə baş çəkərək, onun şərəfli həyat yoluna bir daha şahidlik etdilər.

Muzeydə məktəblilər tərəfindən Qəhrəmanımıza həsr olunmuş şeirlər səsləndirildi və xüsusi olaraq hazırlanmış hədiyyələr muzeyə təqdim edildi. Tədbirin sonunda Mübariz İbrahimov və onun atası Ağakərim kişi haqqında yazılmış kitablar tədbir iştirakçılarına hədiyyə edildi.

Bu ziyarət Azərbaycanın Milli Qəhrəmanlarının şərəfli irsinin yeni nəsillərə tanıdılması və milli dəyərlərin qorunub saxlanılması baxımından xüsusi əhəmiyyət daşıyır.

Cənub Regionu üzrə bölgə müxbiri Bəhruz Əliyev