“Real”ın əfsanəsi, keçmiş hücumçu Raul klubuna, onun dəyərlərinə sadiqdir və ixtiyari məqamda “Barselona”nı dalamaq fürsətini əldən vermir.
Arena.az məlumat verir ki, məşqçilik fəaliyyəti ilə məşğul olan Raul, hazırda Pedri, Qavi və Lamin Yamal kimi oyunçuların aşkar uğurlarına rəğmən, “Real”ın gənclər proqramının “Barselona”dan daha yaxşı olduğunu car çəkərək, “blauqrana”nı dalayıb:
“İctimaiyyət bizim gənclər bölməsini mütəmadi olaraq “Barselona” gəncləri ilə müqayisə edir. İnanıram ki, “Real”ın nəticələri öz sözünü deyir. Hər şeylə yanaşı, bizim də ən yaxşı gənc komandamız var. Bizdə futbolçu yaxşı oynasa, mütləq əsas komandaya düşür, xaricdə başqa klublarda oynamır”, deyə 47 yaşlı mütəxəssis “Barselona” akademiyasından digər əcənəbi klublara axına eyham vuraraq, əzəli rəqibə sataşıb.
Xatırladaq ki, Raul hazırda “Real”ın ehtiyat komandası (“B” komandası) “Real Madrid Kastilya”nı çalışdırır. İspan mütəxəssis 2019-cu ildən “qaymaqlılar”ın ehtiyat qüvvələrinin “komandanı”dır.
